El Principáu llega al millón d’euros n’ayudes a la industria cinematográfica y audiovisual nel 2026 con una convocatoria nueva de 500.000 euros.
- La dotación multiplicóse por diez dende la creación de les llinies específiques pal sector nel 2022, al pasar de 100.000 euros a un millón
- La convocatoria ta dirixida a profesionales autónomos y empreses que desenvuelvan proyectos audiovisuales n’Asturies
- Les subvenciones incluye dende curtiumetraxes, llargumetraxes y series hasta grandes producciones, formatos audiovisuales nuevos y llaboratorios y incubadores de creación
- El plazu pa presentar solicitúes va permanecer abiertu hasta’l 6 d’ochobre
La Conseyería de Cultura, Política Llingüística y Deporte completa anguaño un millón d’euros n’ayudes económiques a la industria del cine y del audiovisual con una convocatoria nueva de 500.000 euros, publicada güei nel Boletín Oficial del Principáu d’Asturies (BOPA).
Con esta inversión el Gobiernu aumenta notablemente los recursos destinaos a un sector estratéxicu n’Asturies, pol so calter tractor y la so capacidá pa xenerar proyectos, desenvolver y captar talentu, emplegu y actividá económica.
Les subvenciones, que son susceptibles de ser cofinanciaes nel marcu del programa del Fondo de Transición Xusta d’España 2021-2027, tán dirixíes a profesionales autónomos y pequeñes y medianes empreses que presenten proyectos audiovisuales pal so desenvolvimientu n’Asturies. La convocatoria cubre les distintes fases del procesu creativu y de producción, dende la preproducción y el rodaxe hasta la postproducción y l’espardimientu de les obres.
Les ayudes incluyen documentales y películes de ficción, curtiumetraxes, mediumetraxes y llargumetraxes, producciones unitaries y series. Tamién s’incluyen formatos nuevos, como les narratives inmersivas y la realidá virtual, otros conteníos audiovisuales y dixitales de calter narrativu y los llaboratorios y incubadores, concebíos como espacios p’acompañar la nacencia y desenvolvimientu de proyectos nuevos.
Les cuantíes adáptense a la clas y dimensión de cada propuesta. Los curtiumetraxes van poder recibir hasta 15.000 euros; los mediumetraxes, hasta 45.000, y los llargumetraxes, hasta 60.000. Les producciones unitaries, series y grandes proyectos van poder recibir hasta 200.000 euros, mentes que los llaboratorios y incubadores van poder llograr un máximu de 80.000 euros. En tolos casos, l’aportación de la Conseyería va poder cubrir hasta’l 70 % del presupuestu del proyectu.
L’audiovisual como oportunidá pal territoriu asturianu
La convocatoria pon tamién el focu nos conceyos incluyíos nos convenios de transición xusta d’Asturies. L’apueste pol audiovisual busca contribuyir a diversificar la economía de los territorios más afectaos pola transición del carbón, favoreciendo la llegada y el desenvolvimientu de proyectos capaces de xenerar actividá y oportunidaes nueves.
Los 500.000 euros d’esta llinia nueva súmense a los destinaos al audiovisual y al cine dientro de la convocatoria xeneral d’ayudes a les industries culturales publicada anguaño. Con dambes convocatories, Cultura algama nel 2026 el millón d’euros n’ayudes directes al sector, ampliando los recursos públicos p’acompañar la creación, la producción y la crecedera de la industria cinematográfica y audiovisual asturiana.
El plazu pa presentar solicitúes ta abiertu hasta’l próximu 6 d’ochobre. Tola información y el formulariu puen consultase na sede electrónica del Principáu d’Asturies o nel enllaz https://miprincipado.asturias.es/-/dboid-6269000414502443707573
Una política estable de sofitu al cine y al audiovisual
El sofitu económicu forma parte d’una política más amplia de la conseyería, que garra les distintes etapes de l’actividá audiovisual: la escritura y el desenvolvimientu de proyectos, la producción d’obres, la formación de profesionales y la participación en festivales y mercaos. Ente les iniciatives en marcha atópase tamién el llaboratoriu de cine Filme LAB LaC6, empobináu al desenvolvimientu de proyectos y a la profesionalización del sector.
La promoción esterior y la captación de rodaxes correspuenden en bona midida a Asturies Paraísu Natural Filme Commission, qu’empresta asistencia a les productores, facilita la busca d’allugamientos y la tramitación de permisos y da a conocer Asturies n’alcuentros profesionales nacionales y internacionales. Esti trabayu favorez la llegada de producciones y la so contratación de profesionales y servicios na comunidá.
L’acción del Gobiernu d’Asturies estiéndese al caltenimientu y espardimientu del patrimoniu cinematográficu. Cultura avera l’audiovisual al traviés de la Cinemateca y la Cinemateca Ambulante, y trabaya na recuperación de la Filmoteca d’Asturies y la creación del Observatoriu del Curtiumetraxe. A estes actuaciones súmase Asturias.FilmAS en dixital, desenvueltu con RTPA pa dixitalizar, caltener y facilitar l’accesu públicu a obres audiovisuales asturianes.
