Madrid y Bruxeles celebren el Día d’Asturies al ritmu de la gaita. Asturianos y descendientes residentes axúntense en redol a la tradición y la cultura del Principáu. El branu tamién se despide con otres cites tradicionales: la celebración del Día d’Asturies en Madrid, y na capital belga, en Bruxeles, qu’entama’l Centru Asturianu.
Asturianos y descendientes residentes ellí, volvieron averase, con romería, sidra y gaites, al Principáu.
Cola tradicional misa n’honor a la Santina empezaba la celebración na Quinta Asturies, en Madrid. Anguaño, col director xeneral d’acción cultural y normalización llingüística como representante institucional.
La música de gaita, romería y sidra emocionaron a tolos que tienen venceyos con Asturies.
Mesma emoción en Bruxeles. Asturies resonó y sintióse en dalgunos de los llugares más representativos de la capital belga. La vicepresidenta Gimena Llamedo foi la representante institucional.
En Bélxica moren más de 8.000 persones venceyaes al Principáu, la mayor comunidá asturiana n’Europa.
