Asturies recibió en 2025 cuasi 2,5 millones de viaxeros. El Principáu llenda a 30 persones los grupos turísticos y prohíbe los altavoces nes visites guiaes.
Asturies recibió en 2025 cuasi 2,5 millones de viaxeros (2.474.542). Nun foi un añu de récord. Pero ye una actividá económica en medría. El númberu de places n’establecimientos turísticos medró más d’un 65% nos últimos 20 años. Xenera’l 11% del trabayu n’Asturies y representa el 9,5% del productu interior brutu, según los últimos datos d’Exceltur.
Güei, día mundial del turismu, falamos de la reforma del decretu que regula a los guíes profesionales n’Asturies. Ente les nueves midíes ta la mengua de los grupos turísticos de 55 a 30 persones y la prohibición d’altavoces nes visites guiaes.
El Principáu llenda a 30 persones los grupos turísticos y prohíbe los altavoces nes visites guiaes
La mengua de los grupos y la prohibición de megafonía yeren dalgunes de les demandes de l’asociación d’informadores turísticos d’Asturies pa un turismu más respetuosu colos vecinos. Unes midíes que yá se tomen n’otres comunidaes asegura Sonia Cernuda, vocera de l’Asociación profesional d’informadores turísticos d’Asturies.
Esperen qu’estes condiciones tamién s’apliquen a otros grupos que se mueven puntualmente pela cai venceyaos a actividaes que nun tán directamente venceyaes col turismu.
El borrador del nuevu decretu ta n’información pública. Actualiza la llexislación vixente dende 2007 y inxerta, per primer vegada, la regulación de les empreses de servicios de guíes pa prevenir l’intrusismu.
N’Asturies hai 300 guíes turísticos habilitaos, anque nun exercen toos.
