Publicado en Aniversariu, Astronomía

1988: Discovery vuelve al espaciu

Discovery vuelve al espaciu dempués del Challenger. El 29 de setiembre de 1988, el tresbordador espacial Discovery desapegó dende’l Centru Espacial Kennedy na misión STS-26. El llanzamientu asocedió a les 11:37 de la mañana, hora local de Florida, y marcó el regresu de los vuelos tripulaos estadounidenses dempués del desastre del Challenger.

El Challenger sufriera una destrucción mientres el llanzamientu de la misión STS-51-L el 28 de xineru de 1986. Morrieron los sos siete tripulantes. L’accidente provocó una suspensión enllargada del programa de tresbordadores y una revisión integral de procedimientos, componentes, controles y sistemes de seguridá.

STS-26 foi diseñada para demostrar que’l programa podía volver operar dempués de los cambeos realizaos. Discovery tresportó’l satélite de comunicaciones TDRS-3.  El satélite pasó a formar parte de la rede utilizada para caltener comunicaciones ente naves espaciales y estaciones terrestres.

La misión duró cuatro díes, una hora y once segundos. Discovery aterrizó’l 3 d’ochobre de 1988 na Base Edwards de California. El vuelu STS-26 volvió a entamar oficialmente les operaciones tripulaes del tresbordador espacial estadounidense dempués d’una posa de más de dos años y mediu.

Autor:

Maestra de Llingua Asturiana Colexu Carmen Ruiz-Tilve - Uviéu