Publicado en Premios Princesa d´A.

Los escaparates d’Uviéu homenaxen a los Premios Princesa

Los escaparates de los comercios d’Uviéu homenaxen a los Premios Princesa.

Más d’un centenar d’establecimientos participen nesta iniciativa.

Uviéu vive estos díes una tresformación, como tolos ochobres per estes feches. Poco a poco, los escaparates del comerciu local entamen a homenaxar a los Premios Princesa d’Asturies. Una iniciativa na que participen más d’un centenar d’establecimientos.

‘Los espíritus del bosque’ d’Hayao Miyazaki pululen tres les vitrines urbanistes nuna viesca húmeda que güel a cueru. ‘Totoro’, Premiu Princesa de Comunicación y Humanidaes siéntese en casa nun escaparate de la cai Asturies.

A vegaes los comerciantes puen escoyer, pero pa los más, el premiáu que-y toca ye como la vida, una sorpresa, pero agradable.

Y a les y los premiaos, nes estanteríes de les llibreríes onde ún descubre de mil maneres los méritos, la trayectoria, y hasta la vida qu’hai tres del personaxe, a vegaes públicu y otres non tanto; pero d’una vida que pue ser tan sorprendente como un gol pela escuadra.

Poco a poco cada premiáu va alcontrando’l so sitiu… Enagora, Messi queda nel bancu…. anque queda convocáu, como toes y toos ustedes, pa la selmana qu’entra.

Más d’un centenar de comercios decorarán los sos escaparates
cola imaxe de les y los premiaos.

La Fundación solliña que la iniciativa ye un reflexu de la participación y del afitamientu social d’estos Premios

Más d’un centenar de establecimientos d’Uviéu decorarán los sos escaparates cola imaxe de les y los galardonaos colos Premios Princesa d’Asturies. Los cartelos espardiéronse esta mañana ente los comercios que participen nesta iniciativa.

Los responsables de la Xunión de Comerciantes afirmen que visibilizar los galardones asítialos nel mundu. La Fundación solliña, per parte de so, qu’esta iniciativa ye un reflexu de la participación y del afitamientu social d’estos Premios.

Autor:

Maestra de Llingua Asturiana Colexu Carmen Ruiz-Tilve - Uviéu