Publicado en Premios, Teatru

4º Premiu Pachín de Melás de testos teatrales

Conseyería de Cultura, Política Llingüística y Deporte🎭 Cultura concede a Patricia Martínez Cueto la cuarta edición del Premiu Pachín de Melás de testos teatrales n’asturianu por «Llugares comunes. Drama rural femenín en trés actos».
La Conseyería de Cultura, Política Llingüística y Deporte reconoz una obra que combina tradición y modernidá, con un usu mui natural del asturianu y una propuesta escénica que va más allá de la pallabra, incorporando espresión corporal, musicalidá y elementos audiovisuales.
🏆 El premiu ta dotáu con 6.000 euros y inclúi la coedición del testu ganador, la so coproducción con una compañía profesional y la so incorporación a les actividaes culturales promovíes pol Principáu.
Una manera d’apoyar la creación teatral n’asturianu y, sobre manera, de dar percorríu a les obres pa que puedan llegar del papel al escenariu.
‘Llugares comunes. Drama rural femenín en trés actos’ apuesta pol feminismu, el folclor y l’asturianu

Buscar les voces de muyeres y faceles surdir pa ocupar l’espaciu públicu. Esi ye l’oxetivu que persigue la obra de Patricia Martínez ‘Llugares comunes. Drama rural femenín en trés actos’ al traviés de cuatro amigues n’escena y un marcu temporal que podría ser perfectamente contemporaneu o pasáu.

N’asturianu y de visión feminista, la tercer exa de la obra pasa pol folclor, qu’apaez pente medies de la figura d’un coru, qu’emula a los de la lliteratura griega.

Gracies al premiu, la obra editaráse nun llibru y podría llevase tamién a escena. Un proyectu qu’aborda temátiques comunes, pero de les que nun se fala siempres.

Pa ello tendrá una xunta cola Conseyería y buscará compañíes profesionales.

 

Autor:

Maestra de Llingua Asturiana Colexu Carmen Ruiz-Tilve - Uviéu