Gaiteros del Carbón sigue completando’l cartelu del so décimu aniversariu cola incorporación de Susana Seivane al conciertu ‘Equí tán… Estos son (Versión 2.0)’, previstu pal 9 de xineru del 2027 nel Teatru de La Llaboral, en Xixón. L’actuación va empezar a les 20.30 hores y va axuntar sobre l’escenariu a la reconocida gaitera gallega col proyectu musical asturianu, que se suma a los artistes anunciaos enantes, Los Berrones y Celtes Cortos. La organización va avanzar nueves incorporaciones al cartelu mientres les próximes selmanes. Les entraes yá tán disponibles al traviés de la páxina web de Gaiteros del Carbón.
Criada nuna familia vinculada dende fái xeneraciones a la construcción y l’interpretación de la gaita, Seivane empezó a tocar el preséu con tan solo trés años. A lo llargo de la so trayectoria desenvolvió una voz propia dientro de la música tradicional gallega, combinando’l respetu pol legáu de los antiguos gaiteros cola apertura a nuevos soníos y formes d’espresión. D’esta miente, la so participación va apurrir al conciertu un alcuentru ente les tradiciones musicales gallega y asturiana, que comparten raíces y una manera de tresmitir la memoria colectiva al traviés de la música. Pa Gaiteros del Carbón, la collaboración tesciende la incorporación d’una artista destacada y representa una oportunidá pa celebrar los venceyos ente dambes cultures.
‘Equí tán… Estos son (Versión 2.0)’ da continuidá al proyectu especial col que’l grupu conmemora los sos diez años de percorríu. En xineru del 2026, la formación celebró dos conciertos nel Teatru José Llión Delestal de La Felguera, dambos con toles entraes escoses en cuestión d’hores. La propuesta combina música tradicional asturiana, arreglos propios, una producción escénica diseñada pa la ocasión y la participación d’artistes convidaos de distintos ámbitos.
La cita de xineru va treslladar la celebración al Teatru de La Llaboral, nun espectáculu concebíu como homenaxe al camín compartíu mientres la última década y a la vitalidá de la música asturiana. El conciertu va dexar al grupu repasar la so trayectoria al pie d’invitaos de distintes procedencies, nuna propuesta que busca averar la tradición a nuevos públicos ensin perder les sos raíces.
