Publicado en Ciencia, Mates

‘Matemagia’ na Selmana de la Ciencia

‘Matemagia’ na Selmana de la Ciencia.  La cita propón 130 actividaes hasta’l 22 de payares.

Convertir les matemátiques en daqué inesperao al traviés de la maxa pa, per un llau, averales al públicu xeneral y, per otru, dotar al profesoráu non universitariu d’un recursu didácticu alternativu.

Esti ye’l doble oxetivu de Matemagia, un taller impartíu esta tarde por profesores de la Facultá de Ciencies, nel que participaron 14 docentes d’infantil, primaria y secundaria. L’actividá enmárcase na XXVI Selmana de la Ciencia de la Universidá d’Uviéu.

La matemaxa ye una rama de la maxa que s’enconta en principios matemáticos y representa, amás, un prestosu mediu de divulgación.

Nesti taller los xuegos con piedres, daos, cartes y monedes tresformen les matemátiques nun espectáculu d’ilusionismu.

Primero presentar el xuegu. Depués convidar a descubrir ónde ta’l trucu. La solución, por supuestu, plantégase como un problema matemáticu.

La matemaxa confirma que tres de la ilusión hai muncha Ciencia.

De les matemátiques al cuerpu humanu. La Selmana de la Ciencia de la Universidá d’Uviéu ufierta tamién la oportunidá de conocer de cerca’l funcionamientu del nuestru organismu.

Una de les propuestes ye la visita guiada al nuevu muséu d’anatomía de la Facultá de Medicina, onde los estudiantes puen descubrir, al traviés de pieces y modelos anatómicos, dalgunos de los secretos del cuerpu humanu y inclusive decidir hacia ónde empobinar el so futuru profesional.

Autor:

Maestra de Llingua Asturiana Colexu Carmen Ruiz-Tilve - Uviéu