Publicado en Intelixencia Artificial

La revolución teunolóxica aporta tamién al campu asturianu.

La revolución de la IA aporta a la güerta asturiana gracies a un inxenieru xixonés: «Date esactamente lo que te fai falta». Juan Cañada crea una ferramienta que tien en cuenta les condiciones de cada faza p’ayudar a tomar decisiones. LNE

La revolución teunolóxica aporta tamién al campu asturianu. El inxenieru mozu xixonés Juan Cañada centró la so tesis doctoral nun sistema que permite recoyer datos precisos de les güertes de la comunidá, col oxetivu de que «el llabor humanu se centre namás na toma de decisiones». Consíguelo al traviés d’un chat con intelixencia artificial que ye quien a responder a les consultes de los usuarios y facilitar les xeres agrícoles. «Ún de los problemes pa vivir na zona rural ye que’l trabayu agrícola resulta poco apetecederu. Esti sistema podría ayudar a afitar población ya incorporar la teunoloxía a los llabores del campu», esplica Cañada, que se desenvuelve profesionalmente nel CTIC Centru Teunolóxicu, en Xixón.

El puntu clave d’esti sistema, que foi premiáu nel III Concursu Inxenieros Mozos por un Mundu Meyor, organizáu pol Institutu de la Inxeniería d’España (IIE), ye la recopilación y l’aprovechamientu de datos que yá existen n’internet, pero que munches vegaes pasen desapercibíos. «Lo único qu’hai que facer pa empezar a utilizalu como ferramienta de trabayu ye da-y les coordenaes esautes de la güerta», esplica Cañada, que llamenta que la mayoría de los sistemes actuales «contesten a les duldes de forma xenérica».

 

La ferramienta, qu’entá ta en fase d’investigación, funciona como un sistema de sofitu pa tomar decisiones relatives a los cultivos y a la xestión del terrenu. Pa ello, axunta información xeográfica y territorial procedente d’estremaos organismos públicos y tresfórmala en datos útiles pa conocer les característiques de cada faza de tierra. «Tenemos a la nuesa disposición una enorme cantidá d’información pública qu’estremaes instituciones axuntaron, procesaron y punxeron a disposición de los ciudadanos. El problema ye qu’estos datos tán mui desaprovechaos», señala l’inxenieru.

Ente les principales dificultaes p’acceder a estos datos ta, per un llau, el desconocimientu de la esistencia d’estes fontes y, per otru, la complexidá téunica del so usu. Ello ye información que puede tar distribuyida en dellos formatos, bandes de frecuencia o sistemes de referencia, polo qu’interpretala y sacar conclusiones requier conocimientos especializaos y ferramientes específiques. «Anque una persona sepa ónde atopar estos datos, nun tien siempre los conocimientos téunicos necesarios pa descargalos, organizalos ya interpretalos. La función d’esta ferramienta ye precisamente facer que toa esa información seya aprovechable por cualquier usuariu», esplica.

Pa consiguilo, el sistema recurre a delles fontes d’información xeoespacial. Ente elles tán les ortofotografíes aérees del Plan Nacional d’Observación del Territoriu, dependiente del Ministeriu de Tresportes y Movilidá Sostenible, que permiten observar el terrenu dende l’aire; les imáxenes y la información satelital del programa Copernicus, impulsáu pola Axencia Espacial Europea y la Unión Europea, y los datos catastrales y de parceles agrícoles del Sistema d’Información Xeográfica de Parceles Agrícoles (SIGPAC), del Ministeriu d’Agricultura, Pesca y Alimentación.

La combinación d’estes fontes permite obtener una visión muncho más completa del terrenu y de les sos característiques. «Si por exemplu tienes una comezón, el tratamientu nun ye’l mesmu nun terrenu que n’otru: esta ferramienta date de forma esauta lo que te fai falta», esplica l’inxenieru. Asina, l’usuariu nun tien que consultar por separao delles plataformes nin enfrentase a archivos téunicos difíciles d’interpretar. El sistema axunta esa información y ponla a la so disposición al traviés d’una interfaz conversacional, de manera que puede formular preguntes en llinguaxe natural y recibir respuestes adaptaes al allugamientu concretu y a les condiciones de cada parcela.

L’oxetivu ye que la teunoloxía nun sustituya’l conocimientu de quienes trabayen la tierra, sinón que-yos apurra meyores ferramientes p’aprovechalu. En cuenta de dedicar tiempu a buscar, descargar y cruciar información d’estremaes fontes, los agricultores pueden concentrase n’interpretar los resultaos y decidir cómo actuar nos sos cultivos. Llegaría asina una suerte de güerta 3.0 «made in» Asturies.

Autor:

Maestra de Llingua Asturiana Colexu Carmen Ruiz-Tilve - Uviéu