Publicado en Sin categoría

L’osu de Villatresmil, un exemplar nuevu atraíu por miel y fruta

L’osu de Villatresmil ye un exemplar nuevu atraíu por miel y fruta, informen los espertos. La Fundación Osu Pardu y la Fundación Osu d’Asturies llamen a una actuación coordinada pa desincentivar al animal y alloñalo del pueblu, «la seguridá y el caltenimientu de la especie nun son oxetivos contrapuestos». La Voz del Trubia

La Fundación Osu Pardu (FOP) y la Fundación Osu d’Asturies salieron al pasu de les informaciones sobre les visites d’un exemplar d’osu pardu a la rodiada y el pueblu de Villatresmil, nel conceyu de Tinéu, yá que consideren importante treslladar delles considerancies sobre les causes d’esti tipu de situaciones y les midíes necesaries pa evitales.

Los datos que se remanen apunten a un exemplar nuevu qu’atopó recursos alimenticios nes proximidaes del núcleu rural, como son la fruta y el miel. Nel casu del miel, los truébanos tán asociaes a una casa habitada y non lloñe del gruesu de les viviendes de Villatresmil.

Convién recordar que l’allugamientu de los colmenares ta regulada pol artículu 8 del Real Decretu 209/2002 qu’establez, con calter xeneral, una distancia mínima de 400 metros al respective de los núcleos de población. Esta regulación, xuntu cola fayadiza protección de los truébanos, escuerre ordenar l’actividá apícola y amenorgar conflictos. El miel y los bárabos de les abeyes son alimentos de gran interés pa los osos, y nun ye conveniente favorecer la habituación d’un osu a buscar estos recursos nos núcleos habitaos.

Per otra parte, la FOA y la FOP constaten que la Guardería del Mediu Natural ta realizando llabores de siguimientu y disuasión del exemplar y que s’aplicó con rapidez el Protocolu d’Intervención con Osos aprobáu nes cuatro comunidaes autónomes cantábriques pa encetar esti tipu de situaciones. Ente otres midíes, intentóse la captura del animal pa lo que s’instaló una trampa Culvert na rodiada de Villatresmil.

Dambes entidaes consideren fundamental que se caltenga una actuación coordinada ente l’Alministración, los axentes medioambientales y los vecinos afectaos, dando continuidá a les midíes de siguimientu y intervención hasta consiguir que l’animal dexe de frecuentar la redolada habitada, que ye l’oxetivu prioritariu.

Coles mesmes, estes dos entidaes quieren treslladar la so comprensión énte la esmolición pola situación que tán vivendo los vecinos de Villatresmil. La presencia siguida d’un osu na rodiada de les viviendes xenera una lóxica y entendible molición.

El caltenimientu del osu pardu y la seguridá de les persones nun son oxetivos contrapuestos. Al contrario: dambes tienen de formar parte d’una mesma estratexa de convivencia, basada na prevención, la eliminación de los factores d’atracción y l’intervención profesional cuando les circunstancies ríquenla.

A lo último, recordamos que, énte la presencia d’un osu nun núcleu habitáu, ye importante nun averase al animal, nun intentar alimentalo y comunicar darréu la so presencia al 112 pa que puedan intervenir los equipos especializaos.

Autor:

Maestra de Llingua Asturiana Colexu Carmen Ruiz-Tilve - Uviéu