Publicado en 7DÍES, Pesca

Pieslla la campaña del bonitu

Pieslla la campaña del bonitu colos meyores resultaos de la hestoria. El papel de la rula xixonesa sal reforzáu na comercialización d’esta especie.

LonjaGijón peslló la campaña del bonitu de 2026 colos meyores resultaos de la so hestoria. Dende les sos instalaciones n’El Musel, puyáronse anguaño 2.365.900 kilos de bonitu, por un valor de 10.215.653,81 euros, un resultáu que supón una importante meyora al respective de les últimes campañes y refuerza’l papel de la rula xixonesa na comercialización d’esta especie.

Les cifres d’esta costera superen llargamente les de los últimos años: en 2025 comercializáronse 1.490.000 kilos por un importe averáu de 6,52 millones d’euros, polo que’l volume puyáu en 2026 aumentó cerca d’un 59 % y el valor de les ventes, un 57 %. Esta evolución tamién ameyora los rexistros de 2024, cuando s’algamaron 1.262.000 quilos y 5,7 millones d’euros, y los de 2023, con 1.588.648 kilos puyaos por un valor de 6,15 millones, informa Puerto de Gijón.

A lo llargo de la campaña, que se desendolcó ente’l 11 de xunu y el 15 d’ochobre, rexistráronse un total de 200 descargues, con una actividá especialmente intensa mientres el mes de xunetu. Nesi periodu puyáronse cerca de 900.000 kilos, alredor del 38 % del total de la campaña, nunes feches nes que los bancos de bonitu s’atopaben a unes dos hores de saléu del puertu xixonés. Esta circunstancia coincidió cola llegada d’importantes volumes de captures y con dos de les xornaes de mayor actividá, nes que se rexistraron descargues cercanes a los 150.000 kilos caúna.

Autor:

Maestra de Llingua Asturiana Colexu Carmen Ruiz-Tilve - Uviéu