Publicado en Asturies

Asina se vendía’l veranéu n’Asturies nel sieglu pasáu

El muséu Nicanor Piñole reabre les sos puertes como una amuesa de cartelos turísticos.

La esposición “Asturies, guapura categórica. Cartelos para’l turismu del Muséu del Pueblu d’Asturies” na que s’amuesen catorce cartelos de promoción turística d’Asturies realizaos ente 1930 y 1984 por dalgunos de los más renombraos cartelistes, pintores y fotógrafos asturianos y españoles: Joaquín Vaqueru, Mariano Moré, Alfonso, Teodoro Delgado, Juan Gomila, etc. Un conxuntu de cartelos que la so contemplación desvela la imaxe que quixo dase y vender d’Asturies.

Primero que nos años 80 del sieglu pasáu «Asturies, paraísu natural» convertiose nun efectivu y duraderu eslogan turísticu, la guapura del paisaxe y la riqueza de la naturaleza de la rexón fueren tamién los grandes reclamos del veranéu nel Principáu. Nel sieglu XIX a Asturies dininla como la Suiza española y, a lo llargo del sieglu XX, les campañes publicitaries de promoción turística siguieron nesa llínea.

Güei, que reabren les sos puertes los museos Casa Natal de Xovellanos y Nicanor Piñole, nesti postreru inaugúrase una esposición temporal, titulada Asturies, guapura categórica, que vuelve esibir 14 cartelos turísticos pertenecientes a los fondos del Muséu del Pueblu d’Asturies para amosar los principales finxos de les distintes estratexes para la captación de braniantes nel sieglu pasáu.

Lo interesao ye que fueron los mesmos viaxeros foranos y los visitantes asitiaos n’Asturies, como esplica l’historiador Francisco Cabriffosse nel folletu de la esposición, quien sollertaron del potencial que tenía’l paisaxe y la naturaleza d’Asturies como reclamu turísticu. El percorríu empecipia con cartelos de 1929 realizaos por Joaquín Vaqueru Palacios y Mariano Moré por ser exemplos de «l’alta calidá formal y estética alcanzada poles campañes del Patronatu Nacional de Turismu a finales de los años 20».

Nos de Vaqueru Palacios, n’alemán y en francés, viéndense los «fabulosos paisaxes» d’Asturies con una vista una tropezosa carretera del puertu de Payares y otru horizonte montascosu cola Basílica de Cuadonga al fondu. Moré, col lema «Asturies espéravos», repite estratexa amosando un paisaxe montascoso con una fila de banderes superpuesta. Dambos artistes incorporen  los nuevos llinguaxes espresivos de la modernidá «para atraer la mirada escontra paisaxes distintivos y emblemáticos d’Asturies como Cuadonga o Payares».

L’amuesa tamién escueye trés cartelos nos que la fotografía mueve les propuestes gráfiques para poner tamién en valor el paisaxe asturiano y qu’amás «respuenden al modelu que s’impon dende la autarquía hasta l’apertura del desarrollismo, cuando les campañes promocionales siguieron dependiendo de les polítiques estatales ya imponiendo una imaxe tópica na so fragmentación, ayena a una conocencia precisa de los valores oxetivos de la singularidá asturiana nel contestu d’una España de sol triunfante».

Autor:

Maestra de Llingua Asturiana Colexu Carmen Ruiz-Tilve - Uviéu