Publicado en Sin categoría, TIEMPU

El Tiempu n´Asturies

SÁBADU 29 D’AGOSTU DEL 2020, ESTÁU DEL TIEMPU Y PREDICIÓN.
Fonte: El Tiempu n´Asturies
Bonos díes, bona xente.
Alborecemos col cielu cubiertu y dellos xarabatos intermitentes, con unes temperatures más propies de la seronda, alrodiu los 15ºC pela costa, de los 12ºC nel interior y los 5ºC pelos puirtos.
Güei l’aire del norte, ta emburriándonos una masa d’aire mui fría ya inestable, procedente de llatitues septentrionales que fadrá baxar bultablemente les temperatures y al pasu pel Cantábricu va dir cargándose d’humedá, topándose cola cordelera, pa dexanos xarabatos frecuentes ya intensos nes zones favoretibles que puen venir acompangáos de tronios a partir del mediudía. El descensu de les temperatures provocará que surda la nieve nes cumes más altes de Picos d’Europa y les Ubiñes, sobre too na prósima nueche.
Durante’l riscar del domingu seguirán les precipitaciones, anque con tendencia a dir remitiendo en frecuencia ya intensidá, y ya pol día dirá meyorando d’oeste a este, calteniéndose cierta inestabilidá nel oriente asturianu. Les temperatures másimes medrarán llixeramente y l’ambiente seguirá siendo serondín, a pesar de los rayinos de sol que van colase pelos claros, caleciéndonos seliquinamente.

El llunes nes zones altes de la cordelera, dellos valles del surocidente ya inclusu en dellos puntos de la costa alborecerá escampláu, nel restu tendremos borrinos ya nublines que formarán nubes baxes ya estratos, con unes temperatures mínimes que sedrán noticia ellí onde se caltenga escampláu pela nueche, pudiendo xelar nes zones favoretibles de montaña. Esti día l’aire sedrá variable y sele y les temperatures másimes subirán dalgo.
Los siguientes díes dirá escamplando per toa Asturies y medrando pali que pali les temperatures, hasta’l xueves ya vienres que volveremos a pasar calor. Paez que de cara al sábadu ya domingu mos entrará’l nordés, apurriéndonos nubosidá ya precipitaciones febles en forma d’orpín pero esto ya lu diremos viendo.
A esfrutar de la lluvia y el fresco que de vez en cuando tamién presta, anque seya branu. Que paséis un bon sábadu, saludos.

Autor:

Maestra de Llingua Asturiana Colexu Carmen Ruiz-Tilve - Uviéu