La Conseyería de Cultura, Política Llingüística y Deporte va ofrecer accesu gratuitu a la telecabina de la estación ivernal de Valgrande-Payares el próximu 1 de setiembre, coincidiendo cola llegada de La Vuelta a España al techu del complexu deportivu, El Cuitunigru. D’esta manera, el Principáu va facilitar l’accesu a la zona alta de la instalación, especialmente a persones con movilidá reducida, families y menores.
El final d’etapa de la ronda ciclista coincide col setenta aniversariu de Valgrande-Payares. Va ser el primeru de los dos finales n’altu que la ronda ciclista va tener n’Asturies, onde’l día 3 va ascender a los Llagos de Cuadonga y la segunda xornada na que va pasar pela comunidá, tres percorrer 81 quilómetros nos conceyos de Degaña y Cangas del Narcea na previa, el sábadu 31 d’agostu. La etapa que finaliza en Payares va salir de L’Infiestu poco primero de les dos de la tarde y va llegar, según l’horariu previstu pola organización, a les 17:20 hores.
Cultura tien programao esta temporada estival un completu programa d’actividaes, Veranu en Payares, col oxetivu de desestacionalizar l’usu de les instalaciones. La propuesta ofrez a los visitantes acceder a los cumes ḷḷenizos usando la telecabina tolos fines de selmana y festivos, hasta’l 15 de setiembre. Esta ofierta, unida a l’apertura del bikepark, les rutes de senderismu y la llegada de La Vuelta, supón un importante estímulu turísticu pa tola comarca, que se complementa cola riqueza cultural, paisaxística y gastronómica de la zona.
La resolución que recueye la gratuidá del usu de la telecabina’l próximu 1 de setiembre puede consultase nel Bopa, al traviés del enllaz siguiente: https://acortar.link/5jqdpJ
