Les saunes castreñas

Les saunes castreñas son un tipu d’edificiu característicu de los castros del noroeste de la Península Ibérica. Asturies tien el grupu más importante de los calteníos –hasta 6 unidaes- que se distribúin sobro los principales asentamientos protohistóricos de la cuenca del ríu Navia: Cuaña (2), Pendia (2), Los Castros de Taramundi, Chao Samartín y Monte Castrelo de Pelóu.

El so orixe remóntase a la Edá del Fierro, cuando se construyeron los más antiguos conforme a un patrón común que se manifiesta tantu na sorprendente semeyanza de les sos proporciones como na selección de los allugamientos.

Esti modelu primitivu de planta rectangular y cabecera absidiada cuntaba con fornu, cámara de vaporización y un pequenu antepar.

A diferencia de les saunes de la área lusitana, llevantaes fora de la cortil urbana y a cuerpu de fastera, n’Asturies ocupen un espaciu preeminente dientro del pobláu ya inmediatu a les zones d’accesu.

En dómina romana yá se constata la evolución diverxente de les vieyes saunes escontra edificios funcionalmente diversos según caltengan la fidelidá al bañu de vapor tradicional o bien afacese a práctiques balnearies probablemente importaes y que riquíen, pola so dependencia del suministru hidráulicu, la instalación de canalizaciones, piscines o estanques de gran capacidá como la pila granítica de Cuaña.