Feliz día de la fotografía a quienes tamién esfruten observando’l mundu al traviés d’una lente, como faigo yo.
Dende bien pequeña garraba’l bus pa ver prestoses puestes de sol y retratales. Deseaba capturar ese precisu instante pa poder velu cuantes veces quisiera. Asina entamó esta hestoria…
Dempués trabayé tres años nun llaboratoriu fotográficu con Ángel, Javi e Iván que me acoyeron como familia y a quienes siempre taré mui agradecida.
Durante unos años tuvi la mio empresa ILFO y dediqueme a retratar eventos, xente de toles edaes, empreses, hasta que ya nun daba pa vivir.
Dende que saqué plaza retrato a los nuesos alumnos pa que tengan recuerdos del colexu, dalgún día prestra-yos vese…
Pero ye a la xente «amiga» y que sé que aprecia les mios semeyes a quien más me presta retratar y acompañar, quienes entren pel güeyo al corazón. Ye la mio aportación a momentos compartidos, un brindis a la amistá.
Estos díes que toi terminando de colocar nel pisu nuevo llibros y recuerdos, les fotos son quiciabes lo más importante porque nelles tamos retrataes lo más importante, les persones: familia, amigos, collacios, alumnáu… Tola xente que cola que compartí vida, espacios, tiempos, rises, llárimes.
Tola xente importante pa mín y la que quiero y querré, camine o non conmigo na actualidá, tea presente o nel cielu, toes eses persones a quienes brindo’l mio recuerdu y cariño.
Si cada fotografía róbate un pocu l’alma, ¿nun ye posible que yo tea dexando partes de la mio alma cada vez que tomo una fotografía? Richard Avedon
