El Principáu sigue trabayando na programación d’esta tercer edición del RegueradaFest, un festival d’empreses qu’utilicen la llingua asturiana y de cultura n’asturianu que rinde homenaxe col so nome a Antón de Marirreguera, nacíu nel conceyu de Carreño y autor de la que se considera la primer obra lliteraria en llingua asturiana.
Al traviés d’esti festival, Candás va convertise de nuevu en puntu d’alcuentru de distintes disciplines artístiques y del mundu de la empresa y la comunicación mientres los díes 11, 12 y 13 d’ochobre, con una programación empobinada a tolos públicos.
La Conseyería de Cultura, Política Llingüística y Deporte abrió’l periodu de solicitúes para les empreses que deseyen participar nel III Reguerada Fest, que se va celebrar en Candás del 11 al 13 d’ochobre. Esti eventu ufierta a les compañíes la posibilidá d’amosar los sos productos o servicios.
Para poder formar parte del festival, les compañíes comenenciudes tienen de comunicar a la Dirección Xeneral d’Acción Cultural y Normalización Llingüística, antes del 15 d’agostu, la so disposición a participar y los sos datos al traviés del corréu electrónicu dxpoliticallinguistica@asturias.org. En concretu, les organizaciones tienen d’indicar nel so mensaxe la siguiente información: nome comercial, persona de contactu, sector (tipu de productu), teléfonu y dirección de corréu electrónicu.
