A mediaos de setiembre produz el celu de los venaos (ciervos en castellán), onde se van apostar a les femes con demostraciones de fuerza. Los bramíos enllenen los montes nes primeres hores a l’amanecida y nes postreres al atapecer.
Un bon llugar para poder columbrar esti sucesu de la naturaleza animal qu’abre la temporada serondiega ye nel Parque Natural de Redes y una opción recomendadísima ye cuntar con Aturruta, espertos en berrea, ente otres munches más actividaes, como l’apicultura o les rutes empuestes. Nesta actividá vamos dar un prestosu paséu pol monte intentando velos, dende cierta distancia pa nun fadia-yos, pero pudiendo esfrutar al máximu de la esperiencia que supon escuchar esos roncos berríos de los venaos.
¿Nun sabes ónde ver la berrea? Equí va una recomendación bien bona nel Parque Natural de Redes. Web: aturruta.com
Lo que popularmente conozse como berra o berrea ye una demostración de fuerza y apareamiento, un periodu que s’empecipia a mediaos de setiembre y remata en payares y que marca la dómina na que, de secute, espierta la líbido de los venados. Un periodu de celu que ruempe’l silenciu tradicional del monte con berríos incesantes. A midida que trescurre la seronda’l clamor animal va in crescendo y llega al so puntu álgido cuando tolos machos apuesten ente sí por consiguir el favor de les femes y demostrar quién d’ente toos ellos ye’l que merez crear una nueva xeneración de venaos.
Mientres selmanes los machos apenes s’ocupen de la so alimentación, pa centrase casi por completu na actividá sexual, hasta’l puntu que tres la berra pueden perder la quinta parte del so pesu. Les turniaes entre cornamentas produz un soníu sobromanera selvaxe, asemeyáu a un españíu, que resona nel cordal. Tres el combate, llobos, utres y demás carroñeros van aprovechase de los más débiles: que salen siempres peor paraos y que nun pudieron demostrar el so gallardía na engarradiella.
Esti espectáculu de la naturaleza podemos contemplalo nel so hábitat, cómodamente y ensin interferir nel so natural desenvolvimientu.
