- Fonte: El Tapín / 13, 14 y 15 de setiembre /
- Centru Sociocultural de la urbanización de Sotu de Llanera, amás de los espacios de Posada y Llugo.
Dempués del ésitu de les ediciones anteriores, Llanera va volver convertise nun escenariu improvisáu cola celebración, el próximu mes de setiembre, del festival «Títere-Lla», una cita imprescindible para neños y mayores que cumple la so quinta edición. Títeres, cuentos, talleres, espectáculos circenses o funciones especiales van ser los grandes protagonistes d’esta nueva convocatoria nel conceyu.
Nun principiu, y na so mayoría, los espectáculos desenvolveranse nel esterior, sacantes que la meteoroloxía lo torgue, y nesi casu van treslladase al espaciu escénicu Plaza de L’Habana de Posada. Asina, les actividaes van empezar el vienres 13 colos cuentos de «El Coneyu Llistu y el Tigre de dos bigotes», al cargu de Teatru Los Pintores, nel parque del centru cultural de Sotu, a les 17.00 hores. Un pasacalles va percorrer les cais de Posada y Llugo, a les 19.30 y 20.30 hores, respectivamente, cola collaboración de la charanga «L’Alborotu» de Villabona.
El sábadu 14, les actividaes van concentrase nel esterior de la Casa de Cultura de Lugo de Llanera, que va acoyer, a les 13.00 hores, l’espectáculu «Engatusados», de Tres la Puerta*Títeres; y a les 18.00 hores, «Almavera. Sonata para violín y títeres», a cargu del grupu de Teatro Etcétera.
Mientres el domingu 15, última xornada del festival, va desenvolvese, a les 16.00 hores, el taller de teatru negru con lluz ultravioleta, para neños y neñes a partir de los seis años d’edá, y a les 17.30 hores, «La Biblioteca d’Eme», con Mar Coloráu Teatru». Dambes actividaes van tener llugar nel esterior de la Casa de Cultura de Llugo.
