- El Tiempu n’Asturies./
- Semeya d’archivu del atapecer nel barriu de Les Campes d’Uviéu que mos l’apurre la nuesa collacia Ainoa.
- Alborecemos col cielu empuercáu de nubes altes con unes temperatures que yá tan condiciones en delles zones pol vientu ábrigu como per exemplu en Mieres que superen los 16ºC, mentantu qu’en Xixón-Campus tienen 5ºC.
- Güei va dir coyendo puxu l’aire ábrigu con raches mui fuertes pela tarde nel llitoral y zones altes que fadrá que suba la temperatura y baxe la humedá, amás mos apurrirá dalgo de nubosidá media-alta, sobre too na fastera más surocidental y cordelera, nel restu predominarán los grandes claros o abancios.
- Mañana domingu seguiremos baxo la influencia del vientu ábrigu ya tendremos un alborecer cálido con temperatures mui perriba de lo normal, averándose en delles zones a los 20ºC. L’aire seguirá soplando con muncha fuercia, sobre too nel llitoral oriental y zones altes de montaña y la nubosidá media-alta dirá n’aumentu pero sin más consecuencies.
- Durante’l riscar del llunes un frente atlánticu barrerá Asturies dexando al so pasu precipitaciones de calter moderáu y un descensu de les temperatures, faciendo que surda la nieve perriba de los 2000m, baxando dalgo más al pasu del frente pero yá sin malpenes precipitaciones. Rolará y amenorgará l’aire, soplando gallegu, apurriéndonos humedá. Pel día tendremos nubes ya claros o abancios quedando escampláu al atapecer con unes temperatures yá normalizaes.
- La selmana viniente paez que tendremos un tiempu seliquino ente nubes medies y altes con temperatures suaves pel día y dalgo más fresques de nueche hasta la fin de selmana que mos llegará otra surada pero esto yá lu diremos viendo.
- Pa más a llargu plazu, de cara a la ponte la constitución, anque seya ciencia fición, entama a vese dalgún mapa de bloquéu anticiclónicu sobre l’Atlánticu que mos metería de sópitu nel iviernu pero esto vamos velo col rabillu’l güeyu.
