Y llegó l’últimu mes del añu y con él, la postrera de les llámines del CalendarioMontepío2024 con #AlmaMinera obra del xenial artista asturianu Alfonso Zapico (Blimea, 1981). Avientu asoma nel almanaque con una ilustración sobro’l conxuntu escultóricu del xenial artista Gonzalo Prau Grela, que lluz nos xardinos de la ResidenciaFelechosa y que simboliza la vida, y les etapes y distintes xeneraciones que componen les families, dende la infancia, la edá adulta y los güelos, que lleguen a la Residencia nuna evolución natural. Nel centru, el mineru productor de carbón, col primer logotipu tricolor del Montepío, fai de nexu.
Prau Grela realizó estes escultures, feches con otru elementu bien simbólicu: los filos de cobre que nun se podíen usar una vegada que se producíen les detonaciones na mina. Estos filos, que Prau Grela denomina «tiger» son la base de les sos escultures, apostando pol recicláu pa realizar el so arte.
Tocantes a la llámina, Zapico rexistra una vegada más colos sos trazos de forma xenial l’atmosfera d’esti llugar: que calendariu más disfrutón tuvimos anguaño 2024.
Nota: Alfonso Zapico ye Premiu Nacional del Cómic 2012 y autor del meyor llibro del xéneru en 2023 pa l’Asociación de Llibreros de Madrid pol cuartu tomu de la so novela gráfica «La balada del Norte». Más info sobro l’autor https://www.montepio.es/calendario-2024-bio-alfonso-zapico/
