L’academia uvieina resulta escoyida como la meyor de too el país nos premios «Duende». N’Uviéu báillase al son de la excelencia. La Escuela de Danza Lía, allugada nel barriu de Pumarín, acaba de ser galardonada col «Duende d’Oru», un prestixosu galardón que la acredita como la meyor academia d’España dientro de la so disciplina, la meyor d’ente les más de 700 qu’optaben al premiu.
Amás, dos de les sos baillarines tamién fueron reconocíes como los meyores del país na so categoría: Liani Bouñoso, de 12 años, nel apartáu d’infantil, y Laura Gálvez, que tien 19, nel d’adultos.
«Tamos bien contentes. Ye una reconocencia al trabayu diariu de los profesores y al de toles moces y mozos de la escuela», esplica Lía González, que ye la directora.
La ceremonia d’entrega de los premios «Duende» tuvo llugar en Marbella el pasáu xueves. L’academia uvieina foi escoyida la meyor d’ente les más de 700 qu’optaben al premiu. «Los xueces pásense tol añu de provincia en provincia pa evaluar les escueles y hai xuna gala clasificatoria a la que se presenten solistes y tamién coreografíes grupales. Dempués vanse superando fases y los xueces tomen les sos decisiones», esplica Lía González. Tanto Liani Bousoño como Laura Gálvez fueron escoyíes como los meyores d’España na categoría de «Show dancie», xuna fusión d’estilos. «Nel so casu entemecieron la danza coles acrobacies porque esi ye el fuerte de la nuesa escuela».
La escuela que tien más de 400 alumnos de toles edaes, tien un palmarés apináu de títulos. Ente otros cunten con un tercer puestu nel Campeonatu del Mundu del 2015 y con trés campeonatos d’Europa. «Agora tamos clasificaes pal Mundial de Serbia, pero esta disciplina nun tien subvenciones y nun sabemos si vamos poder allegar por motivos económicos»
