- Alborecemos con grandes claros o abancios ya con unes temperatures que tan alrodiu de los 4ºC, rexistrándose nel puirtu Payares 0.5ºC onde ayeri pela tarde-nueche nevaba con intensidá y se facien obligatories les cadenes pa circular.
- Güei vamos tener escasa nubosidá pela mañana pa dir aumentando de tarde hasta dexanos el día nuble con unes temperatures que subirán llixeramente anque l’ambiente seguirá siendo fríu. L’aire sedrá sele ya variable.
- Mañana martes si que va templar abondu l’ambiente con unes temperatures másimes qu’algamarán los 15ºC en munches zones d’Asturies con vienteu ábrigu que pue soplar moderadamente en zones altes de montaña. El cielu va tar nuboso cola apertura de dellos claros o abancios pero tamién cola posibilidá de que caiga dalguna gotera a primeres y últimes hores del día.
- El miércoles dempués d’una mañana seliquina col cielu nuboso pero sin precipitaciones y temperatures suaves al mediudía la llegada d’un frente de tarde-nueche va dexanos precipitaciones xeneralizaes y un descensu de les temperatures al soo pasu con una cota de nieve anicial perriba de los 2000m pero baxando a últimes hores alrodiu de los 1500-1600m. L’aire rolará a componente norte con raches moderaes en zones de montaña ya en puntos del llitoral.
- El xueves van abrise grandes claros ya tendremos un día soleyeru con unes temperatures que van camudar poco, el vienres va tar nuboso pero sin precipitaciones, sicasí na fastera más surocidental d’Asturies si paez que puea llover dalgo y el sábadu otro frente va dexanos precipitaciones xeneroses ya un descensu de les temperatures pero esto yá lu diremos viendo.
