«Entamen a baxar les temperatures
y remiten les precipitaciones»
y remiten les precipitaciones»
- Alborecemos con intervalos nubosos entemecios ente dellos claros o abancios, dempués d’una nueche pasada per agua con unes temperatures que tan alrodiu de los 13ºC, rexistrándose nel puirtu Payares 6,7ºC.
- Güei remitirán les precipitaciones ya tendremos intervalos nubosos entemecios ente dalgún claru o abanciu cola posibilidá de que surdan nublines ya borrinos al escurecer no fonderu los valles. Les temperatures másimes en descensu y l’aire sedrá sele ya variable con predominiu de la componente norte.
- Mañana domingu lo más destacáu va ser el vientu nordés que pue ser cafiante na costa amás de baxar la sensación térmica con un descensu de les temperatures. Nel cielu predominarán los grandes claros o abancios quedando escampláu en munches zones, sicasí alboreceremos con nublines y borrinos no fonderu los valles.
- La selmana viniente van ser mui destacaes les xelaes nuecherniegues por iversión térmica, pudiendo algamase los -4ºC o -5ºC nes zones más favoretibles y llegando a xelar en zones urbanes con isla de calor, sobre too los alboreceres del martes y miércoles. Tendremos el cielu escampláu y temperatures contenies al mediudía, sicasí ellí onde temos abellugaos y calecios pola llume del sol templará l’ambiente a primera hora de la tarde.
