Hasta’l xueves vamos ver nevar con intensidá en prácticamente tolos sistemes de monte de la península. Los acumulaos pueden algamar el metro de nieve.
Nevó inclusive en delles capitales, como en Llión, sele en Cuenca y tamién en zones de monte d’Albacete y Murcia. Nes próximes hores les nevaes pueden ser más bayuroses en zones altes y yá tenemos avisos mariellos y naranxes activos.
La rexón ta n’alerta por fuertes vientos, aguaxe y nevaes. Nel Cordal Cantábricu espérense acumuladures de nieve de diez centímetros d’espesura en 24 hores a partir de los 1.000 metros y raches de vientu de más de 100 kilómetros per hora. No que va de día, yá se superó esa cifra: en Vega d’Ariu llegose a los 134 kilómetros per hora. Y lo peor ta por venir. L’Axencia Estatal de Meteoroloxía preve a partir de la próxima madrugada espesures de nieve de 20 centímetros.
Delegación de Gobiernu activó, a les 12.00 hores d’esti miércoles, la fase d’alerta del plan de vialidá ivernizu nel puertu de Payares y na autopista del Güerna (AP-66). La fase d’alerta supon l’esplegue y movilización de les máquines quitanieves y esparcidoras de fundentes por que puedan ser utilizaes cuando sía necesariu.
Según detalló la delegada del Gobiernu n’Asturies, Adriana Lastra, nel puertu de Payares hai disponibles seis camiones quitanieves con GPS, una turbofresadora dinámica quitanieves, una pala cargadora, 1.500 tonelaes de fundentes y 10.000 llitros de salmoria.
Al respective de la la AP-66, Aucalsa dispon pa les aguaes asturiano y lleonés de l’autopista de 14 camiones con cuchiella y esparcidor de fundentes, una máquina quitanieves dinámica, trés pales cargadores de fundentes, 5.635 tonelaes de fundentes y 300.000 llitros de salmoria.
En total, na rede de carreteres del Estáu n’Asturies hai disponibles 53 máquines quitanieves, depósitos p’almacenar 498.000 llitros de salmoria y silos con 9.915 tonelaes de fundentes.
