La cultura del acebache, la xoya asturiana que llucha por sobrevivir: «L’artesanía puede morrer con esta xeneración». La declaración BIC xenera mires, pero tamién pon al descubiertu la escasez de mineral y la necesidá de más sofitu institucional.
María Pérez y Svetlana Poutilina, na esposición de l‘Asociación Cultural d’Acebache Xurásico de Villaviciosa. / Carla Vega
El 26 d’avientu de 2024, la Cultura del Acebache foi declarada Bien d’Interés Cultural (BIC) de calter inmaterial pol Gobiernu del Principáu. Esta reconocencia busca protexer una tradición artesanal que, mientres sieglos, tuvo íntimamente amestada a la rexónsobremanera a la parte de Villaviciosa. Sicasí, la decisión tamién punxo sobro la mesa los desafíos qu’enfrenta esti sector, dende la falta de materia primo hasta la necesidá urxente de formación y mayor sofitu institucional.
María Pérez, maestra acebachera y presidenta de l’Asociación Acebache Xurásico de Villaviciosa, valora’l xestu, pero nun despinta’l so escepticismu. «El BIC ta perbién, ayúdanos a poner l’acebache en valor, pero si nun se fai namás, non vale absolutamente pa nada, a cencielles, como nos dixeron a nós, ye un papel guapu», indica.
Svetlana Poutilina, secretaria de l’asociación y artesana recién qu’enfrenta les dificultaes del sector, confirma esti sentimientu: «Esperamos que sirva pa faer munches coses, como promover formación, asegurar un relevu xeneracional y facilitar el llogru d’acebache».
L’acebache asturiano calidable, aniciáu a partir de protopináceas del Xurásicu y únicu poles sos propiedaes físiques, ta en situación crítica por cuenta de la escasez de materia primo. Según María Pérez, llegóse al puntu de que los artesanos vense obligaos a restolar n’escombreres o en cantiles tres argayos pa consiguir pequenes pieces. «Lo que tenemos nun nos sirve, son pieces bien pequenes y de mala calidá», llamenta.
«Cuando s’atopa xuna pieza d’acebache, xuntámonos equí los miembros de l’asociación pa partir, y ye que tocamos a gramos», añede María Pérez. «Ye una pena porque garré non puede trabayase. Claro, el lignitu vien en bloques de quilos, que puede trabayase a prestar, pero ye qu’eso nun ye acebache», sorrayen.
La situación tamién afecta al mercáu d’artesanía, como comenta Svetlana Poutilina. «Nos mercadinos, ufierto pieces de lignitu a 3 euros y d’acebache a diez. Cada vez hai más xente que, cuando quedo ensin les d’acebache, diz que meyor nun merca nada. O que prefieren pagar pola d’acebache pola calidá y lo que significa. Quiero pensar qu’eso ye frutu tamién del trabayu de divulgación que faemos». Sicasí, señala que non tou ye positivu. «Tamién escuché a artesanos afirmando rotundamente que toles sos pieces son d’acebache, cuando toos nel sector sabemos que nun ye asina, porque nun hai baltes cantidaes», sorraya.
