Educación va inaugurar en septiembre el nuevu institutu de La Corredoria, que va llevar el nome de la bioquímica ‘Margarita Salas’, con unidaes en toles etapes. L’equipamientu va empecipiar la so actividá con una estimación de 520 estudiantes para los cuatro cursos de Secundaria y los dos de Bachilleratu.
- Fonte: Actualidá Asturies / La Voz /
El IES va formar parte del programa d’enseñanza de llingües estranxeres, col nivel HABLE+. La conseyería va partir ente los dos centros del barriu uvieín al alumnáu de 2º a 4º de la ESO y de 1º y 2º de Bachilleratu.
La Conseyería d’Educación va inaugurar el próximu cursu’l nuevu Institutu d’Enseñanza Secundaria (IES) del barriu de La Corredoria (Uviéu), que va bautizar col nome de la prestixosa bioquímica asturiana Margarita Salas. El centru va abrir les sos puertes en septiembre colos cuatro cursos de la ESO y los dos de Bachilleratu para distribuyir la matrícula de manera equilibrada ente los dos IES que van convivir nel barriu. Amás, va formar parte del programa d’enseñanza de llingües estranxeres, col nivel HABLE+.
El Gobiernu d’Asturies decidió, de manera escepcional, abrir el nuevu equipamientu al completu pa dar respuesta a los problemes d’espaciu esistentes nel actual institutu del barriu. L’espediente de creación del centru ta en fase d’aprobación y, nestos momentos, atópase nel Conseyu Escolar del Principáu. Una vegada completáu esti trámite, va sometese a l’autorización del Conseyu de Gobiernu a tiempu pal entamu del periodu d’almisión.
El IES Margarita Salas va ser el centru de referencia pal alumnáu que ta cursando Primaria nos colexos públicos La Corredoria, Poeta Ángel González y el Carmen Ruiz Tilve, los mesmos que nutren al actual institutu del barriu. L’alumnáu de 1º de la ESO d’esos centros va entrar pol procedimientu ordinariu (por baremu) acordies con la so puntuación.
Amás, nesti primer añu, l’Alministración va partir ente los dos institutos al alumnáu de 2º, 3º y 4º de la ESO y de 1º y 2º de Bachilleratu que yá ta matriculáu nel actual IES de La Corredoria. El métodu escoyíu pa decidir quién pasa al nuevu institutu ye un sortéu, que nun va dixebrar hermanos y que va facilitar la organización de les families.
En concretu, el IES Margarita Salas va abrir les sos puertes con 20 unidaes: 16 d’ESO (cuatro en cada nivel) y 4 de Bachilleratu. Nesta etapa ufiertarán trés modalidaes: Xeneral, Ciencies y Tecnoloxía y Humanidaes y Ciencies Sociales. El primer añu van poder matriculase hasta 520 estudiantes, pero’l centru entá va tener capacidá pa crecer, si fuera necesariu.
Previsión de plantiya. En cuanto al personal, van crease cinco puestos de calter non docente, pa cubrir dos places d’alministrativu y trés d’ordenances. A falta de conocer los númberos definitivos, la previsión de la plantiya orgánica de profesoráu va rondar les 40 places, once d’elles de nueva creación. El restu del profesoráu va venir de l’actual plantiya orgánica del IES La Corredoria que va ser reasignáu al Margarita Salas. La plantiya definitiva, incluyíu’l personal interino, va conocese cuando se concreten les solicitúes.
La Dirección Xeneral de Personal Docente trabaya nun resolvimientu que va regular el mecanismu para redistribuir al profesoráu de plantiya orgánica que tien plaza nel actual IES de La Corredoria. L’oxetivu ye cuntar de manera prioritaria col personal que quiera pasar al nuevu institutu.
Pa cubrir la plaza de dirección, va recurrise al procedimientu ordinariu. D’esta miente, va convocase un concursu y les persones candidates tendrán de presentar un proyectu pa cuatro años. Darréu, la dirección va nomar al restu del equipu: secretariáu, xefatura d’estudios y xefatura d’estudios axunta.
La conseyería yá comunicó a la familia de Margarita Sales la so intención de poner el so nome al nuevu centru, xuna decisión que reconoz la trayectoria de la científica, el so llabor divulgativu y la so implicación con Asturies y cola Universidá d’Uviéu. Educación rínde-y un homenaxe similar al del so padrín profesional, Severo Ochoa, que da nome al IES de L.luarca.
Per otru llau, caltuviéronse xuntes colos representantes de les asociaciones de padres y madres y tamién cola dirección del IES de La Corredoria pa informar de los planes d’apertura que remana l’Alministración.
