- Alborecemos col cielu poco nuboso o escamplaú ya con unes temperatures que tan alrodiu de los 5ºC, rexistrándose nel puirtu Payares 0,5ºC.
- Güei va dir n’aumentu la nubosidá media-alta pa dexanos el día nuble al atapecer con unes temperatures másimes n’ascensu ya col aire que sedrá sele ya variable.
- Mañana miércoles tendremos intervalos nubosos entemecios ente dellos claros o abancios. La nubosidá sedrá estratificada y afeutará sobre too a la fastera central d’Asturies, tando más escampláu hacia la cordelera con unes temperatures que van camudar poco. L’aire sedrá del nordés con dalguna racha molesta nel llitoral.
- El xueves alboreceremos ente’l borrín y la nublina y asina taremos la mayor parte la mañana, tendiendo, a partir del mediudía, a llevartar dalgu con unes temperatures mínimes n’ascensu, mentantu que les másimes anicien un descensu. L’aire sedrá de componente norte sele en xeneral.
- Paez que’l vienres vamos tener precipitaciones, un descensu de les temperatures y nieve na cordelera perriba de los 700m, pero esto yá lu diremos viendo y nun vos fies de los titulares sensacionalistes que yá tan saliendo porque tien tola pinta a que la cosa va quedar ahí, un vienres con tintes ivernales y poco más. Como suele ser vezu l’atlánticu emburria muncho y nos corta la circulación retrograda cuando xusto mos llega a nosotros.
