«Muncho precuru col xelu»
- Alborecemos col cielu poco nuboso o escampláu ya con muncho xelu por mor del agua d’ayeri y les baxes temperatures d’esti alborecer, rondando los 0ºC na mayor parte d’Asturies y rexistrándose nel puirtu Payares -7,2ºC.
- Güei vamos tener una mañana seliquina y fría, amás de soleyera pero a partir del mediudía dirá n’aumentu la nubosidá pa dexanos la tarde nuble y precipitaciones febles al final de la xornada con unes temperatures que subirán dalgo les másimes pero con unes mínimes en descensu. L’aire sedrá sele ya variable.
- Mañana domingu una masa atlántica cálida y húmeda va dexanos un ascensu bultable de les temperatures con másimes perriba de los 15ºC, amás cola posibilidá de precipitaciones febles na fastera surocidental, nun descartándose nel restu d’Asturies dalguna gotera, nel cielu tendremos intervalos nubosos con dalgún claru o abanciu y l’ambiente templará abondu.
-
El llunes más de lo mismu la puxarra atlántica nos cortará l’iviernu de sópitu con nubosidá baxa y dalgo d’orpín pero con temperatures suaves anque dalgo más baxes que’l domingu.
- El martes l’aire ábrigu dixebrará los borrinos y nublines del llunes y fadrá subir de nuevu les temperatures, dexándonos una selmana seliquina, alternándose díes de sur con díes de borrín.
Anque hai muncho movimientu atlmosféricu, como los últimos años, siempre mos toca’l lláu malu. Los anticiclones polares desparramando aire fríu per tol hemisferiu norte y nosotros en mediu tragando vientu ábrigu. Seguiremos sollertes y esperando que camuda la situación.
