- Alborecemos col cielu cubiertu y lloviendo con unes temperatures que tan alrodiu de los 7ºC, rexistrándose nel puirtu Payares -0,5ºC onde ta nevando.
- Güei vamos tener xarabatos durante tol día que sedrán más probables ya intensos pela tarde cuando la cota de nieve pue baxar hasta los 600-700m. Col camudu’l día escamplará y entamará a xelar en munches zones d’Asturies. L’aire sedrá sele ya variable con predominiu de la componente norte y les temperatures descenderán bultablemente pela tarde.
- Mañana sábadu alboreceremos col cielu escampláu ya con xelaes xeneralizaes. Durante la tarde dirá n’aumentu la nubosidá y al finar el día nun se descarta dalguna precipitación feble ya dispersa con unes temperatures mínimes en descensu mentantu les másimes subirán dalgo.
- El domingu y llunes una masa d’aire atlántica mos invadirá faciendo subir bultablemente les temperatures col cielu nuboso y la posibilidá de que caiga dalguna gotera dispersa ya ocasional.
