¡World Football Summit escueye’l Principáu d’Asturies como puntu de partida pa la primer xira nacional de La Menina WFS 2025! 
En collaboración cola Conseyería de Cultura, Política Llingüística y Deporte y la RFFPA – Real Federación de Fútbol del Principáu d’Asturies, esta iniciativa simboliza’l compromisu cola igualdá y el lideralgu femenín nel fútbol 
- La xira va percorrer les ciudaes de:
Xixón, Avilés, Samartín (Samartín del Rei Aurelio), Uviéu
Ente febreru y marzu, vamos axuntar a figures destacaes del deporte femenín español
¡Convidámoste al actu inaugural! 
6 de febreru / 
18.00 hores/ 
RFFPA – Real Federación de Fútbol del Principáu d’Asturies
- Por cuenta del aforu llimitáu, hai qu’apuntase equí: https://tinyurl.com/4bbb3r8b
El Principáu y la Federación de Fútbol de Asturies traen a la comunidá’l proyectu Menina World Football Summit pa impulsar el lideratu femenín nesti deporte
- La imaxe d’esta iniciativa, qu’incluye actividaes variaes, son dos figures de muyeres deportistes inspiraes na obra de Velázquez
- La xira nacional empieza’l xueves en Xixón con un actu que precisa inscripción previa
- La conseyera de Cultura sorraya la importancia de “visibilizar y reivindicar el papel de les muyeres nel mundu deportivu con exemplos y referentes incuestionables”
La Conseyería de Cultura, Política Llingüística y Deporte, en collaboración con World Football Summit (WFS) y la Real Federación de Fútbol del Principáu (RFFPA), llogró qu’Asturies seya’l puntu de partida pa la primer xira nacional La Menina WFS 2025, un símbolu del compromisu cola igualdá y el lideratu femenín nel fútbol. La iniciativa va pasar pelos conceyos de Xixón, Avilés, Samartín del Rei Aurelio y Uviéu ente febreru y marzu, con un programa d’actos que va axuntar a figures destacaes del deporte femenín español.
“N’Asturies llevamos munchu tiempu trabayando pola igualdá y la inclusión nel deporte. Siendo sabedores de que’l camín pa la igualdá plena ye llargu, pero imprescindible, tenemos qu’encaralu ensin demoranza. Por eso, con iniciatives como’l proyectu de La Menina WFS queremos visibilizar, difundir y reivindicar el papel de les muyeres nel mundu del deporte, con exemplos y referentes incuestionables y tamién animando a les más moces a suañar ensin llendes”, destacó la conseyera, Vanessa Gutiérrez.
La xira va empezar en Xixón el xueves, 6 de febreru, con un actu institucional a les 18:00 hores na sede de la Real Federación de Fútbol del Principáu, que va cuntar cola presencia de representantes de competiciones y federaciones del ámbitu nacional y autonómicu. A lo llargo del eventu, va presentase l’axenda completa de la xira, con feches y detalles de toles actividaes. Tamién se van tratar temes como’l lideratu de les muyeres nel deporte o la importancia del exerciciu pa la salú femenina, cola presencia d’educadores físiques reconocíes pol so papel na ciencia del deporte. Pa participar nel actu inaugural, d’aforu limitáu, ye menester formalizar la inscripción nesti enllaz: https://tinyurl.com/4bbb3r8b
Dos figures de la Menina WFS, dos muyeres futbolistes inspiraes na obra de Velázquez que representen los valores d’igualdá, resiliencia y lideratu, van tar presentes en dellos puntos de Xixón, del 6 al 16 de febreru.
La xira va continuar en Samartín del Rei Aurelio, el 16 de febreru, pa depués siguir n’Avilés, del 17 al 27 de febreru, onde va celebrase una charla ente muyeres referentes locales con neños y neñes sobre’l so futuru profesional y la importancia de la práctica deportiva pa construyir la so personalidá.
La xira va rematar n’Uviéu, onde del 28 de febreru al 9 de marzu van tar espuestes les figures imaxe de la iniciativa en puntos emblemáticos de la ciudá.
