Mapa de Martín na esposición de Posada de Llanes
Llanes quepe nun mapa: asina ye l’espectacular mural del pintor llaniscu Carrero del Álamo. La obra, qu’amuesa cientos de recursos del conceyu, puede vese na Casa de Cultura de Posada hasta’l 31 de marzu.
Almirar tola guapura del conceyu de Llanes dende’l Picu Turbina, el más altu de la Sierra del Cuera ye’l puntu de vista qu’ufierta «El Mapa de Martín», la obra de Martín Carrero Del Álamo, un mozu artista de 28 años natural de Puertes de *Vidiago. La so impresionante llámina, de gran formatu y apinada de detalles, puede visitase na Casa de Cultura de Posada de Llanes hasta’l 31 de marzu.
La pieza, de 365 x 150 centímetros, ye muncho más qu’un simple mapa. A la primer vista, amuesa la figura del conceyu en planu, pero, al detenese nella, esplégase un universu de referencies históriques, etnográfiques, culturales y naturales: «Punxi a faer idees sobro un mapa pa Llanes y complicóseme… Nun quería faelo tan grande, pero volví llocu y, espurriendo, quedóme esto. Tenía un añu pa faelo y terminé en trés», confiesa l’autor.
P’afigurar la esencia del so conceyu natal, Carrero empecipió’l so trabayu con una visualización de la zona vía satélite. Depués percorrió los distintos pueblos en busca d’elementos naturales y arquitectónicos representativos: «Conocíame de pe a pa la zona de Vidiago, pero nos pueblos del occidente costóme muncho más. Tuvi que faer un trabayu d’investigación importante y preguntar a amigos que vivíen neses zones. Aprendí enforma y afayé munchos intereses del conceyu», esplica.
Cada rincón de Llanes ta reflexáu con un nivel de detalle sorprendente. Nel mar, apaecen representaes les especies acuátiques del Cantábricu; nos montes, la fauna local; y nos pueblos, les sos ilesies y escueles. Actividaes como la ganadería o l’agricultura, deportes tradicionales como la cuatriada de bolos, festividaes emblemátiques como la de los pescadores de Santa Ana, el plantíu de les fogueres como la de Balmori, o folclore col baille del pericote: «Inclúi toles localidaes y los sos elementos más representativos. Tamién metí un pocu de cultura, gastronomía y hasta parte de la nuesa hestoria», detalla l’autor.
Ente esos elementos históricos destaquen los barcos marinos del sieglu XVI, la emigración a América, la caza de ballenes o la batalla d’El Mazucu. Tamién apaecen horros, cueves prehistóriques menos conocíes y xacimientos como los de La Pereda, Quintana y Bricia, que los sos afayos caltienense nel Muséu Arqueolóxicu d’Uviéu.
Tou tien un sentíu nesta obra y xuna razón de ser: «Cada planta y árbol, les fueyes, los tipos de cogordes, los páxaros… Nun tán feches de manera xeneral, tou son referencies locales. Por casu, el campu de golf de Cué d’antiguo foi un aeródromu y tuvi qu’investigar qué tipu d’aviones aterrizaben ellí y pintalo talo como; o les variedaes de mazana que s’usen pa mayar na zona», concreta.
