- Alborecemos col cielu nuboso y fuertes raches de vientu en zones altes con unes temperatures que tan alrodiu de los 14ºC, rexistrándose nel puirtu Payares 5,9ºC.
- Güei vamos tener el cielu nuboso con precipitaciones pela mañana, amás l’aire ábrigu va soplar con muncha fuercia en zones de montaña, faciendo que tengamos unes temperatures mui suaves. Pela tarde abriranse dellos claros o abancios y al finar el día dirá amenorgando’l vientu.
- El vienres tendremos el cielu nuboso pero con escases posibilidaes de lluvia, l’aire seguirá siendo ábrigu polo que les temperatures van ser altes, amás va seguir soplando cafiante en zones altes.
- El sábadu la entrada de vientu de componente noroeste va dexanos un descensu bultable de les temperatures y xarabatos frecuentes ya intensos que sedrán de nieve ente los 1000-1200m, sobre too pela mañana, tendiendo a dir perdiendo fueye ya frecuencia pela tarde.
- El domingu seguirá el tiempu revueltu y fríu con delles precipitaciones y nieve pela cordelera.
