Fonte: El Comercio
Vamos amanecer con cielos pocu nublos polo xeneral, sacantes delles borrines en zones del centru d’Asturies principalmente. Estes borrines, comoquier, van sumir cola meyora de la mañana polo que’l sol va acabar rellumando en prácticamente tol Principáu.
Pero a partir del mediudía van entrar nubes pel sur y l’oeste que se van estender a tola Comunidá Autónoma mientres la segunda metá de la xornada. Esta nubosidá va dexar bastios d’orixe tormentosu que van afectar a munchos puntos de la rexón pudiendo descargar localmente con cierta fuerza (sobremanera nel cordal).
Los vientos van soplar de componente este na mariña pela mañana, pero acabarán afitándose de noroeste pela tarde en toa Asturies.
Les temperatures máximes van xubir un pocu nel oriente, van baxar nel occidente, y van caltenese nel centru.
Les mínimes, sicasí, van xubir de forma xeneralizada.
El sábadu vamos empezar el día con nubes y delles precipitaciones débiles que van ser más probables y frecuentes escontra’l sector oriental. Esta inestabilidá va unviar col pasu de les hores y, a lo llargo de la tarde, nun se refuga la posibilidá de que puedan dise abriendo delles escamplaes. Les temperatures van baxar tanto les máximes como les mínimes.
El domingu va ser un día soleyeru y, los primeros díes de la próxima selmana, esperamos temperatures que podríen devasar los 25 ºC.
