«Naide tien el derechu d’usar el mio estilu d’esta forma». El director xaponés Hayao Miyazaki, fundador de Studio Ghibli, espresó’l so descontentu respectu al usu d’intelixencia artificial pa xenerar imaxes qu’asonsañen l’estilu distintivu de les sos películes. Miyazaki, conocíu pola so dedicación al dibuxu a mano y narratives imaxinatives, considera que l’aplicación d’IA na animación ye «un insultu a la vida mesma».
L’enclín de «Ghiblificación», que dexa tresformar imaxes y memes populares al estilu Ghibli por aciu ferramientes d’IA como ChatGPT, xeneró esmolición sobro los derechos d’autor y el futuru de los artistes humanos. Miyazaki manifestó’l so refugu a incorporar esta tecnoloxía nel so trabayu, enfatizando que quien crean estes ferramientes «nun tienen idea de lo que ye’l dolor».
OpenAI acaba d’actualizar el xenerador d’imaxes de ChatGPT, y los usuarios nun paran de compartir en redes sociales imaxes icóniques recreaes al estilu anime de Studio Ghibli. Info.
Esti usu d’IA pa retrucar l’estilu de Studio Ghibli plantega cuestiones étiques y llegales, especialmente en relación cola apropiación del trabayu d’artistes ensin el so consentimientu. Críticos argumenten que tales práctiques desvalorizen la creatividá humana y esploten la reputación d’estudios como Ghibli ensin autorización. Miyazaki alvierte qu’esti enclín reflexu una perda de fe na humanidá y nel valor del esfuerzu artísticu xenuinu.
«Toi dafechu disgustáu. Enxamás incorporaría esa tecnoloxía al mio trabayu. Siento que ye un insultu a la vida mesma, y que ye una señal de que los humanos tamos perdiendo la fé en nós mesmos». Hayao Miyazaki, cofundador de Studio Ghibli, al respective de les imaxes xeneraes con intelixencia artificial; fai casi 10 años. Apocayá fíxose enclín xenerar imaxes d’intelixencia artificial al estilu d’esti estudiu.
«Ye’l director d’animación más influyente na hestoria del mediu y unu de los 10 narradores favoritos en cualesquier mediu audiovisual. El trabayu de Miyazaki provoca esa rara emoción: el respigu al reconocer un tipu de guapura que ye imposible nel mundu real y tamién ye un realista brutal respectu de la cobicia, la guerra y la roxura humano». Guillermo del Toro
