- Fonte: Adrián Carbayales/ imaxe
- RTPA /
Asturianada Mortal, la novela d’artes marciales asturianes con estética manga y inspiración en películes y videoxuegos de los 80.
«Hai una hestoria que se tresmite ente los místicos, o más bien una lleenda, que diz que’l xiringüelu ye una cosa ancestral, qu’esistía yá cuando l’home yera nuevu… Que yá taba equí primero de los godos, y de los romanos, y de los celtes… Que cuando pisaron estes tierres los primeros indoeuropeos, yá lu baillaba la tribu primitiva que tropezaron. Yera un ritu relixosu dedicáu a una especie de deidá solar… una vegada escuché a un teólogu especular con que podría tratase d’un ánxel d’altu rangu».
La isla de Talasia ye un llugar malditu, de xuru que lo más asemeyao al Infiernu qu’hubo nunca na Tierra. Pero l’asturianu Apolu García, un maestru xiringüiteca, sabe que so hermana s’alluga ehí y nada va aparalu hasta alcontrala. Nin la gandaya que puebla la ciudá, nin los milenta monstruos que s’escuenden nella.
Esta ye la novela n’asturianu con más hosties por páxina nunca escrita. Un mecigayu de videoxuegos, manga, películes d’acción de los ochenta, mitoloxía y paconismu. ¡Descubri’l secretu espiritual del xiringüelu!
La ilustración de la novela usa la intelixencia artificial
‘Asturianada Mortal’ ye la última novela d’Adrián Carbayales. L’escritor plasmó en papel un mundu imaxinariu nel qu’Apolu García, espertu nun arte marcial mui asturianu, adiéntrase nuna isla erma pa salvar a la so hermana.
Los protagonistes d’esta novela fantástica enfréntense a los malos nel presente, gracies a les conocencies tresmitíes pol meyor de los maestros: so güelu. L’autor de ‘La Rexenta contra Drácula’ vuelve dar rienda suelta a la imaxinación, con Asturies y la cultura asturiana como filu conductor. Esta vegada, cola intelixencia artificial como sofitu.
