L’Aemet agora que nos próximos díes van algamase los 35 graos en delles zones del Principáu. Les autoridaes sanitaries encamienten protexese de les radiaciones solares, hidratarse y evitar el consumu de bébores alcohóliques. Fonte: Actualidá Asturies
La Conseyería de Salú va activar mañana’l nivel d’alerta 3 (riesgu máximo) del Plan Nacional d’Actuaciones Preventives de los Efectos de los Escesos de Temperatura sobro la Salú 2024 énte les previsiones de l’Axencia Estatal de Meteoroloxía (Aemet), qu’agora que nos próximos díes van algamase temperatures cimeres a los 35 graos en delles zones del Principáu.
Les autoridaes sanitaries aconseyen a la ciudadanía protexese de les radiaciones solares, s’hidrate y evite el consumu de bébores alcohóliques. Amás, aportunen na importancia de curiar de la población más vulnerable al calor, esto ye, quien sufren enfermedaes cróniques o trabayen al campu y neñes y neños.
Tamién encamienten que se caltengan en fríu los alimentos, yá que col calor aumenta’l riesgu d’infecciones alimentaries.
La Dirección Xeneral de Salú Pública yá unvió a los centros sanitarios, a la Conseyería de Derechos Sociales y Bienestar y a la Federación Asturiana de Conceyos (FACC) la documentación, qu’inclúi los siguientes encamientos sanitarios énte esta situación d’altes temperatures:
- Beber agua y líquidos con frecuencia, anque nun se sienta sei y con independencia de l’actividá física que se realice.
- Evitar les bébores con cafeína, alcohol o bien azucaraes, yá que pueden favorecer la deshidratación.
- Emprestar especial atención a ñácaros y menores, lactantes y muyeres xestantes, según a persones mayores o con enfermedaes que puedan agravase col calor (patoloxíes cardiaques, renales, diabetes, hipertensión, obesidá, cáncer, patoloxíes qu’enzanquen la movilidá, llocura y otres enfermedaes mentales, según l’abusu de drogues o alcohol).
- Permanecer el mayor tiempu posible en llugares frescos, a la solombra o climatizaos, y enfrescase cada vez que sía necesariu.
Amenorgar l’actividá física y evitar deportes al campu nes hores centrales del día. - Usar ropa llixero, folgosa y que dexe transpirar.
- Evitar dexar a cualquier persona en vehículos aparcaos y zarraos (especialmente a persones menores d’edá, mayores o con enfermedaes cróniques).
- Consultar a profesionales sanitarios énte síntomes que s’enllarguen más d’una hora y que puedan tar rellacionaos coles altes temperatures.
- Caltener les medicines nun llugar frescu, cuidao que el calor puede alteriar la so composición y los sos efectos.
- Faer comíes llixeres qu’ayuden a reponer los sales perdíos pol sudu (ensalaes, frutes, verdures, zusmios, etc.)
Plan Nacional contra’l Calor 2024
El Plan Nacional d’Actuaciones Preventives de los Efectos de los Escesos de Temperatura sobro la Salú actívase tolos branos ente mayu y setiembre ya inclúi, ente otres midíes, la monitorización de les previsiones de temperatures p’Asturies, ellaboraes pola Aemet y l’espardimientu d’alertes rellacionaes col calor cuando estes previsiones superen niveles de riesgu pa la salú, estremáu ente situaciones de riesgu baxo, mediu y alto.
El plan busca menguar la morbilidá y la mortalidá acomuñada a temperatures elevaes, yá que se reparó que trés o más díes consecutivos de temperatures altes y non habituales pueden dir acompañaos d’una medría neses cifres.
L’asignación de los niveles d’alerta realízase teniendo en cuenta los estragales establecíos pal Principáu, qu’asitien les temperatures máximes nos 25 graos.
