- Maxi Areñes y Maitetxu Isla creen el dúu de «folk intimista» Nuramay
- Fonte: Música Asturiana.com /por Xicu Ariza
«Folk intimista, ensin demasiaes pretensiones, una muyer que canta y un paisanu que l’acompaña con instrumentos variaos». Ye la frase cola que Maxi Areñes resume lo que ta detrás de Nuramay, el so proyectu musical nuevu xunto a la so compañera Maitetxu Isla. Sicasí, esti dúu ye abondo más.
«Munchos romances de tola península, dalgún d’ellos sefardí, vieyos cantares en llingua catalana, y por supuesto, temes propios n’asturianu» dan forma a esti grupu que yá tien asoleyaos tres singles del que va ser el so primer discu: Cantares de tierra y mar.
Nuramay surdió «en metá de les grabaciones de Maxi pal prósimu trabayu de Fontoria, nel que ta inmersu dende mayu», desplica la vocalista del proyectu. «Plantegóme la idega de facer algo xuntos muncho más tranquilino, más íntimo y lloñe del tipu de producción tan complexa que-y conlleva un discu de Fontoria» y asina ye como axuntaron «cantares tradicionales de diferentes xeografíes y temes propios» pa da-yos un aire nuevo.
Una amuesa d’ello son los tres cantares que yá tán disponibles en YouTube y qu’Isla presenta asina: «“Xuxurien les fueyes” fala de la guapura que mos trae la seronda y ye quiciabes el más intimista de tou el discu; “La Galana y la Mar” ye un tema de celebración de boda na tradición sefardí; “Patria” fala d’una Asturies aparentemente dormida y que ta naguando por espoxigar».
Les lletres xueguen un papel importante d’ente toles pieces que van poder sentise en discu’l próximu mes d’avientu. D’esta manera, Maitetxu Isla destaca por ser «perespecial» ún que tien lletra del so bisgüelu, Ángel Ruiz y Pablo, «escritor menorquín mui reconocíu». Nél, Maxi «incluyó un cachín d’una grabación de fai más de 40 años» na que canta’l pá d’Isla. «Teniendo en cuenta que mio padre morrió teniendo yo 7 años, podéis imaxinavos lo máxico qu’esi tema ye pa min y cuánto me presta cantalo», añade la vocalista.
Nuramay vs. Fontoria
«Esti grupu nun supón la voráxine de Fontoria. Tantos instrumentos, músicos collaborando y nel escenariu, hores y hores de producción…», comenta Areñes comparando los dos proyectos. Afirma que «en tres pistes queda’l tema termináu», agradez sentise «relaxáu» y «nun ser el protagonista, namás un músicu encantáu de poder compartir cola so compañera de vida tamién esti proyectu». El dúu yá tien «dalgún conciertu apalabráu n’Uviéu pa enantes de que fine l’añu», que va ser l’estrenu d’estos cantares nuevos enriba d’un escenariu.
