Vero Rubio publica “El día”, single del so primer discu en gallego-asturianu

Vero Rubio llanza un cantar en gallego-asturianu con lletra de Miguel R. Monteavaro y con un soníu sele, ente’l pop, la canción d’autor y con muncha emotividá.

Yá ta na canal de YouTube de Vero Rubio “El día“, el primer tema qu’esta multiinstrumentista canguesa asoleya dempués de ganar el XV Premiu Camaretá al Meyor Cantar. Trátase d’una canción en gallego-asturianu con lletra de Miguel R. Monteavaro y qu’espeya’l soníu que caracteriza a esta artista: música sele, ente’l pop y la canción d’autor y con una gran carga emotiva. El single ye l’adelantu de los 11 temes que Vero Rubio va amosar nel so primer discu de llarga duración.

«Namás lleer esti poema de Miguel R. Monteavaro, la melodía vínome como un rayu a la cabeza», desplica Rubio sobre un cantar nel que «la música tien la división mental de los sentimientos encontraos… de sentite fuera ya l.lonxe dalgunas vegadas… un puquinín de fraxilidá… ya tierra». Grabáu ente la «cueva» de l’artista y los estudios Cámara Discos d’Andy da Silva, en “El día” collaboren Puri Penín «faciendo coros con esa voz guapa ya dulce que tien» y Palula Menéndez al violonchelu, «dando-y pies al cuerpu de la música». Lo demás instrumentación –pianu, voz y fliscornu– cuerre a cargo de Vero Rubio.

“El día” -que ve la lluz acompañáu d’un lyric video– ye’l single adelantu de lo que va ser l’estrenu discográficu de la canguesa. «Va tener 11 cantares, cola so música, el so poema/lletra y la so imaxe/videu… hailos cantaos ya instrumentales», desplica. Amás añade que ta encargándose ella «de muito, casi tou: las grabaciones, la mezcla… ya’l puntu final dalo Andy da Silva». Entá nun hai fecha de publicación, pero una cosa tien clara l’artista: «hai muito cariñu detrás ya muito mimu… Tardéi muitos años en facer pública la mía música, nun puedo llanzame y facela agora a lo “l.louco”».

Sigui la xira

El pasáu mes d’abril Vero Rubio entamó la xira Vou cola que dio nueve conciertos ente abril y xunu. «Foi un aprendizaxe y un viaxe inolvidable» valora la multiinstrumentista sobre esta serie de conciertos que va siguir «pa fines d’añu ya l’añu qu’entra» tanto en formatu en solitario como con banda. Asina ye como, dempués de muncho guardase pa sí mesma la so capacidá creativa –«l’aselu que tengo faciendo la mía música, nun ye normal…»-, Rubio continúa’l so camín propiu y arriquez a la música n’asturianu con una propuesta qu’aporta aire nuevo a la escena.