- Fonte: El Periódico d’España /
- Asturies: BIC de calter inmaterial / Cultura sidrera /
- Exame aprobáu (y con nota) para ser Patrimoniu de la Humanidá.
- L’informe oficial reconoz la bébora como «símbolu d’identidá» y valora que xenerara «una amplia comunidá de preservación cultural».
La candidatura de la cultura asturiana de la sidra pasó l’exame técnicu de la Unesco para convertise en Patrimoniu Cultural Inmaterial de la Humanidá y queda namá pindia de la ratificación oficial, que se va producir dientro d’un mes n’Asunción (Paraguay). Hasta agora yera BIC: Bien d’Interés Cultural de calter inmaterial: Cultura de la sidra
El denomináu Órganu d’Evaluación encargáu d’analizar les distintes propuestes presentaes per países de too el mundu envalora nun informe emitíu’l pasáu llunes que la bébora asturiano «cumple los criterios d’inscripción na llista representativa» y, arriendes d’ello, encamienta a los miembros del Comité Intergubernamental de Salvaguarda del Patrimoniu Cultural Inmaterial que se van axuntar na capital paraguaya del 2 al 7 d’avientu que faigan efectiva esa inclusión. Ye daqué que puede dase por fechu, a la vista del documentu positivu emitíu polos técnicos, que nun ponen pega dalguna a la documentación unviada pol Principáu al traviés del Gobiernu d’España.
Los especialistes miembros de la Unesco valoren especialmente que la sidra asturiano suponga «una amplia comunidá de preservación cultural, na que s’atopen productores y llabradores» y na que «les conocencies y les habilidaes tresmitinse de manera informal dientro de les families».
Amás, sorrayen que «la introducción al serviciu y degustación de la sidra realízase tradicionalmente por aciu la imitación y la tresmisión oral», remarcando que les conocencies na materia céntrense n’aspeutos tales como «el suelu, les condiciones climátiques, la selección de les variedaes locales de mazanes y les particularidaes de la molienda, el prensáu y la fermentadura de los mostios». Amás, los evaluadores tienen bien en cuenta qu’alredor de la sidra asturiano desenvolviérense «diverses funciones sociales y significaos culturales, incluyíos venceyos cola cocina local, práctiques de socialización, producción sostenible y preservación de paisaxes rurales».
Ente los argumentos remanaos pa xustificar esta reconocencia, los espertos aconceyaos pola Unesco dan gran valor al fechu de que la sidra asturiano «promueve la sostenibilidá medioambiental al traviés del cultivu responsable de mazanes, les práctiques agrícoles sostenibles y los envases reutilizables». «Tamién promueve la cohesión social y l’igualdá de xéneru al traviés de la so presencia n’eventos comuñales y celebraciones tradicionales qu’inclúin a tolos miembros de la sociedá», añede’l documentu.
Otru aspeutu que foi perbién acoyíu ye que la solicitú d’inclusión de la cultura de la sidra na llista representativa del Patrimoniu Inmaterial provenga del propiu sector, «al traviés de les organizaciones qu’integren el conseyu regulador de la Denominación d’Orixe Protexida Sidra d’Asturies».
