Ferla Megía publica ‘Páxaros 01’

L’artista Ferla Megía asoleya un EP n’asturianu de seis temes nel que fusiona dellos xéneros y influyencies, dende lo tradicional a lo contemporáneo. L’artista mozu sierense Ferla Megía asoleya’l so primer EP n’asturianu dafechu: Páxaros 01.

Dempués de los adelantos de «Xatu» y «bele bele«, y la so participación nel Premiu Camaretá al Meyor Cantar con «medrana a medrar«, llanza esti trabayu de seis temes nos que fusiona xéneros y influyencies, dende’l dembow, hip hop y trap hasta’l folk tradicional, trip hop, ambient y electrónica. Espérase que Páxaros 01 tenga una segunda parte enllena de collaboraciones entá por confirmar.

Ferla Megía destaca dientro d’esti EP dos temes inéditos: «Ya nun pueo«, una composición fecha a partir d’un son d’arriba de Puntarás (Cangas de Narcea) qu’amiesta con una copla tradicional; y «Pérame«, inspirada nun boleru clásicu y na música tradicional, con samples de Manu Chao y Muyeres, un «cantar del corazón», como desplica l’artista.

Esti llanzamientu en plataformes musicales ta acompañáu, tamién, d’un formatu físicu fechu artesanalmente pol músicu qu’inclúi, amás, mezcles inédites y otru conteníu esclusivu. Va poder mercase nel so bandcamp y nos conciertos de presentación de Páxaros 01.

El camín de Ferla Megía ye’l d’un artista n’evolución. En 2020, decidió que’l so proyectu anterior nun espeyaba la so visión musical. Entamó a esplorar un enfoque más intimista y, nesi mesmu añu, presentó’l so tema «Algún día». En 2021 llanzó’l so primer EP, Fruto de la memoria, con un estilu más cercanu al R&B. Tres d’estos trabayos, dedicóse a afondar na música de raigañu y a reconeutar coles sos influyencies tradicionales. En 2023 retomó’l so proyectu asoleyando dellos singles de manera independiente, a la gueta de nueves sonoridades y calteniendo la fidelidá a los sos raigaños; dos aspeutos reflexaos en Páxaros 01.