- LNE /
La resurrección» de los Aguilandeiros de San Xuan de Villapañada cumple una década: «Nun ye un desfile, somos aguilandeiros un día al añu». Tres una refecha investigación, l’Arquivu de la Tradición Oral d’Ambás impulsó’l regresu de la tradición, de la que solíen participar «los mozos» de la zona.
La mazcarada moscona trunfa por especial y sobrevive por auténtica. Resucitó fai unos diez años, a partir d’una rigorosa investigación del Arquivu de la Tradición Oral d’Ambás (ATOAM), salió de les alcordances de los más mayores que compartieron les sos conocencies con Xosé Antón Ambás y Ramsés Illesies, y va volver esti sábadu a percorrer les cais del pueblu y picar a les puertes. Porque los Aguilandeiros son y, en Grau, siguen siendo del pueblu.
«En redol a 2014 vivióse un ‘boom’ na recuperación de les mazcaraes, y non solo n’Asturies. Sí que ye ciertu que, la zona del Noroeste ye una zona bien rica en cuánto a estes mazcaraes, anque tamién les hai por tola península y por toa Europa. Tán venceyaes a la tradición del solsticiu y el camudar. Esta, cuantimás, ye siempres nel solsticiu d’iviernu», señala Ambás.
Nun había fecha esacta, pero alredor de les navidaes los mozos de la zona de San Juan de Villapañada en Gráu, tradicionalmente, vistinse de personaxes especiales y icónicos y representaben los sos papeles. «A la fin ye como una representación de la llucha ente’l bien y el mal, al traviés d’esos personaxes. Yo, soi daqué críticu coles mazcaraes, nel sentíu en que nun ye un desfile folclóricu. Soi aguilandeiro un día al añu, invístome de vieya y representola col so la infertilidad… Ende ye onde la mazcarada ta viva», cuenta Ambás.
«El diablu», la dama yá´l galán», el cura, y la cenicera son dalgunos de los personaxes que van danciar y van percorrer los caminos del pueblu. D’un núcleu a otru moveránse en tractor. «Interpretamos los nuesos papeles con un oxetivu que ye pidir l’aguilandu. La verdá ye que’l llabor d’investigación foi bien importante. Oldeamos con tolos vieyos de la zona hasta dar colos personaxes. Xente de más de noventa años. Arrexuntamos información sobro’l vestuariu y, el primer añu, ficímoslo col Grupu Xeito», destaca’l músicu.
Imposible resalvar la emoción del pueblu moscón en recuperando’l so mazcarada dempués d’unes siete décades. «Ver les cares de la xente que volvió ver a los aguilandeiros na puerta de la so casa, dempués de vivilos de pequeños…Foi increíble», cunten Ambás y Illesies.
Según la so investigaciones, hasta dieciséis persones llegaron a formar parte de la especial comitiva moscona d’aguilandeiros. Esti próximu sábadu van empezar yá’l so percorríu a les 10:00 hores per Rozaes, Acebéu, La Llinar y San Xuan. Depués, en redol a les 15:00 hores, el campu de la ilesia va ser el llugar d’alcuentru y disfrutre d’una merienda.
