Falamos con Ferla Megía p’afondar na so propuesta y nel relevu xeneracional na música asturiana enantes de que toquen nel III Semando Fest que va celebrase’l 8 de febreru en Lata de Zinc- «La xente qu’escoyemos l’asturianu pa facer música ye porque fainos sentir más cerca d’onde vivimos»
El sábadu 8 de febreru en Lata de Zinc (Uviéu) va celebrase’l III Semando Fest, festival de música moza n’asturianu qu’entamen Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica común de que la mayoría de los sos componentes son menores de 35 años. La segunda confirmación foi la de Ferla Megía, que va ufrir un conciertu onde poder sentir estilos como la electrónica, ambient, pop, dembow, folk o canción d’autor. Con él siguimos una serie d’entrevistes dedicaes a afondar nes propuestes que van sonar nesta edición del Semando Fest con reflexones, amás, sobre la situación de la música moza del país anguaño.
Anque lleves na escena asturiana dende cuasique l’adolescencia con dellos proyectos estremaos, nun foi hasta va unos años que decidisti dar el pasu d’emplegar l’asturianu y el patrimoniu musical del país nes tos composiciones, ¿qué foi lo que t’empobinó a facelo? A decir verdá, soi l’únicu asturianu de la familia. Los mios güelos yeren del sur (Castiella La Mancha), pero yo tuvi la suerte de ñacer equí y de mamar dende guah.e la música del país y el paisaxe, que tamién ye responsable d’inspirame. Entamé con 15 años cantando n’inglés porque los mios referentes yeren anglosaxones (lo típico: Nirvana, Red Hot Chili Peppers…). Nun foi hasta 2019 o asina qu’entamé a cantar en castellán, y hasta dempués de la pandemia, cuando fui consciente y asimilé dafechu’l mio contestu, cuando me decidí a camudar d’estilu y llingua pa facelo n’ast. ¡Inda quédame la virxen por deprender!
«Soi l’únicu asturianu de la familia. Los mios güelos yeren del sur Castiella, pero yo tuvi la suerte de ñacer equí y de mamar dende guah.e la música del país y el paisaxe, que tamién ye responsable d’inspirame»
Nesi sen, n’Asturies, anque poca por dellos motivos y, ente ellos, la emigración, hai música moza, pero munches propuestes nun escueyen les nuestres llingües, ¿por qué pienses que ye? Siento qu’inda l’asturianu (sacantes escepciones) nun entró na musica “de gran consumu”, entendiendo lo entrecomillao como’l pop, el rnb, el hiphop, el (mal llamáu) urban… Supongo que la xente qu’escoyemos l’asturianu pa facer música ye por que nos presta, cenciellamente, porque fainos sentir más cerca d’onde vivimos o medramos.
Si afondamos, amás, nes escenes d’otros territorios del Estáu con llingües propies, vemos ceo que los estilos urbanos tán afitaos nos grupos mozos. Sicasí, equí tovía queda camín por andar anque propuestes como la tuya, Mostru l’Horru o Llevólu’l Sumiciu yá lu entamareis, ¿cómo lo ves dende la to perspeutiva? De xuru queda camín por andar. Nesi sentíu, Llevólu y Mostru l’Horru fueron de dalguna manera los proyeutos que me llanzaron a facer lo mio n’ast. N’otros territorios hai munchísimu talentu tamién, y soi optimista: nos siguientes años texeránse conexones ente estes comunidaes no que se refier a la música.
«Siento qu’inda l’asturianu (sacantes escepciones) nun entró na musica ‘de gran consumu’»
Dende qu’asoleyasti los últimos singles y el to discu Páxaros 01, tas emplegando les tos redes sociales p’amosar el trabayu de producción qu’hai detrás de la to música, ¿por qué? ¿Trátase d’un enfotu pedagóxicu? Dende llueu l’enfotu pedagóxicu pue que tea ehí, porque agora mesmo toi estudiando’l máster de profesoráu. Bromes aparte, quería amosar la mio manera de trabayar porque hai munchu matu y préstame compartilu y xenerar diálogu.
«Llevólu’l Sumiciu y Mostru l’Horru fueron de dalguna manera los proyeutos que me llanzaron a facer lo mio n’ast»
Per otru llau, coneutando sol Semando Fest, ¿cómo ves el relevu xeneracional na música asturiana? Tamién siento optimismu. El fechu de qu’haiga un festival dedicáu a la xente mozo faciendo música n’ast yá quier decir daqué. Cada vez habrá más artistes que se desarrollen n’ast, de xuru.
¿Qué dificultaes topasti como artista mozu pa entamar y afitate na escena? Nun lo toi sintiendo difícil. Los y les artistes que s’averaron a mio musica siempre lo fixeron de bon rollu y yo tovía póngome coloráu cuando la xente a la qu’almiro cunta conmigo pa facer coses. ¡Siéntome mui agustu y esti 2025 será meyor aún!
«Los y les artistes que s’averaron a mio musica siempre lo fixeron de bon rollu y yo tovía póngome coloráu cuando la xente a la qu’almiro cunta conmigo pa facer coses»
¿Qué aporta la to propuesta a la escena moza? Nun sabría responder… eso que lo diga la xente, si ye qu’aporto daqué (rises).
«Faedría falta dalgún tipu de colectivu xestionáu polos propios artistes»
¿Faen falta más proyectos de música moza n’Asturies? ¿Qué formatu-yos daríes? (Non namás grupos o artistes, sinón tamién festivales, conciertos, residencies artístiques, etc.) Faedría falta dalgún tipu de colectivu xestionáu polos propios artistes. Sería pernutritivu, incluyendo toles disciplines, estilos y xéneros.
¿Qué otros artistes mozos d’anguaño o d’antaño t’inspiraron? Una de les influencies ta clara… Cuando sentí Manual de Cortejo en 2019 quedé cola boca abierta. Descubrióme una manera nueva de facer música… ¡Gracies Rodri! Llevólu’l Sumiciu, amás de ser collacios, inspírenme siempre con cada cosa que van sacando… son los meyores.
«Cuando sentí Manual de Cortejo en 2019 quedé cola boca abierta. Descubrióme una manera nueva de facer música»
Yá p’acabar, ¿qué puedes avanzanos del to conciertu nel Semando Fest? Que la xente va baillar y llorar. ¡Espero que-yos preste muncho!
