Güei alzamos la voz para visibilizar la necesidá de que menores y adolescentes con cáncer, según les sos families, cunten con atención psicolóxica especializada. Un diagnósticu de cáncer infantil impacta na salú físico y emocional del menor y en tou la so redolada. Por eso, ye esencial garantizar sofitu psicolóxicu en toles etapes del procesu oncolóxicu. Pidimos que los servicios sanitarios puedan ufiertar sofitu y cuidaos psicoemocionales necesarios, amás de que se creen programes específicos de sofitu a les families.
🫂 Les asociaciones qu’integramos la Federación Española de Families de Cáncer Infantil siguimos trabayando por que la salú mental sía parte fundamental del tratamientu oncolóxicu.
- L’ HUCA atiende cada añu unos 30 nuevos casos de cáncer infantil, con una tasa de supervivencia que ronda’l 80%
- Les leucemies y los linfomes representen más d’un terciu de los diagnósticos, siguíos polos tumores del sistema nerviosu central
Fonte: Actualidad Asturies / https://cancerinfantil.org / Blogue con recursos /
La Unidá d’Oncohematología Pediátrica realiza tolos tipos de tresplante, un serviciu que namá ufierten una trentena d’hospitales en tol país. L’Hospital Universitariu Central d’Asturies (HUCA) atiende cada añu una trentena de nuevos casos de cáncer infantil, con una supervivencia relativa que ronda’l 80%. Esti cálculu realizose a los cinco años del diagnósticu y el porcentaxe bazcuya ente’l 75% y el 90%. Trátase d’una cifra más elevada que na edá adulta, similar a la media del Sistema Nacional de Salú y a la de los países próximos.
Por tipos, les leucemies y los linfomes representen más d’un terciu de los diagnósticos, siguíes polos tumores del sistema nerviosu central.
La Conseyería de Salú realizó esti balance con motivu del Día Mundial contra’l Cáncer Infantil, que se celebra mañana y que tien por oxetu concenciar sobro los desafíos de neños, neñes y adolescentes afectaos por esta enfermedá y les sos families. Otru de los propósitos de la xornada ye aportunar na necesidá de que tolos menores, en cualquier llugar del mundu, tengan accesu a un diagnósticu y un tratamientu fayadizos.
N’Asturies, la área d’oncohematología del HUCA practicó na última década más de mediu centenar de tresplantes de migollu óseu a menores con unos índices de sanamientu bien elevaos. Cada añu realicense ente 90 y 100 tresplantes de migollu óseu en toles edaes, unos cinco a pacientes infantiles, y dalgunos d’ellos d’alta complexidá.
Esta unidá, integrada na Área de Pediatría, trabaya coordinadamente col restu d’especialidaes pediátriques y departamentos del hospital y asume el tratamientu de tolos tumores infantiles de la comunidá. Amás, realiza tou tipu de tresplantes, un serviciu que solo ufierten una trentena d’hospitales en toa España.
La unidá cumple colos encamientos de la Estratexa del Cáncer del Sistema Nacional de Salú y ta en comunicación constante coles unidaes nacionales de referencies a les que, si ye precisu, remite a los pacientes pa ciruxíes complexes o tumores que riquen d’un tratamientu local bien específicu, por casu, la protonterapia.
L’HUCA enceta’l cáncer infantil, acaldía más curable, dende un enfoque integral tantu pa neños y neñes como pa les sos families, cuidao que rique tratamientos complexos y de cutiu llargos. Nesa atención ta arreyáu personal médico y d’enfermería especializáu, amás de profesionales de psicoloxía y trabayu social, y l’equipu d’Aules Hospitalaries.
L’hospital ufierta tamién aceleradores llineales de partícules d’última xeneración que dexen meyores nel tratamientu gracies al usu d’avanzaos programes de radioterapia. Ente’l catálogu de prestaciones qu’ufierta’l HUCA pal abordaxe del cáncer infantil destaquen les siguientes:
- Acompañamientu mientres 24 hores na UCI (pa tolos menores ingresaos n’unidaes de cuidos intensivos, non solo pa pacientes oncolóxicos)
- Sala de xuegos y aula hospitalaria d’oncoloxía pediátrica.
- Habitación d’aislamientu. Ye un apartamentu de daqué más de 50 metros cuadraos qu’inclúi l’habitación, cuartu de bañu, zona de tar p’acompañantes con salón-cocina y área pa visitantes con un interfono que dexa que’l menor pueda ver a los sos familiares y amigos y comunicase con ellos.
- Habitación individual pa los neños y neñes ingresaos.
- Cama d’acompañamientu y mantención pa un familiar.
- Bicicleta estática y otros enseres de l’habitación de tresplantes.
- Voluntariáu qu’apurre distracción y ociu a neños y neñes ingresaos y un respiru al familiar que los acompaña.
- Actividaes y talleres variaos.
- Sala de xuegos dotada con videoconsoles, televisión, pantalles…
- Terapia psicolóxica de sofitu a demanda del personal facultativo o de les families y pacientes.
- Posibilidá d’elección de menú.
- Siguimientu nel hospital de día pediátricu con personal especialmente entrenáu.
** Nes imaxes, l’actu del Día Internacional contra el Cáncer Infantil organizáu pola Asociación Galbán nel HUCA, al que asistieren el xerente del Sespa, Aquilino Alonso; el vicecoseyero de Ciencia, Innovación, Investigación y Transformación Digital, Iván Aitor Lucas, y el director xeneral de Promoción de l’Autonomía Personal y Mayores, Enrique Rodríguez Nuño.
