El CPI de Llugones acueye a les 20h (8 de marzu) l’estrenu en directo d’esta banda pop-rock-folk encabezada por componentes de Cerezal.
- Web / Spotify / Musicasturiana.com /
Vérsica: Un viaxe poéticu y musical, dende la sensibilidá al reflundiu
Vérsica ye una obra multidisciplinar qu’axunta lliteratura, música y diseñu artísticu. Entama na base d’un cuentu escritu por Gonzalo Pumares y producíu por Marcos Álvarez (Cerezal). Un cuentu que trescurre al traviés de 10 cortes musicales y nel que cada ún d’esos 10 cortes musicales ye un poema que, de dalguna mena, esplica una parte de la hestoria del protagonista del cuentu: un vieyu que yera mozu.
Con poemes d’autores consolidáos d’anguaño, como Miguel Monteavaro, Xurde Fernández o Vanessa Gutiérrez, d’autores de la nomada Segunda Xeneración y con obra principalmente nos últimos años del sieglu XX (Xabiero Cayarga, Taresa Lorences), o con testos de los primeros años venti (Nené Losada, Fernán Coronas). Na esbilla de los poemes tuviéronse mui en cuenta los sentimientos del protagonista, como la soledá, l’abandonu, el mieu o la perda, pero también l’amor a la tierra, la conexión cola naturaleza y la felicidá.
Na mano, Vérsica ye un cuentu infantil, una discu, una escultura.. Los diseños de Miguel G. Díaz dan-i a la obra un envoltoriu únicu, siendo esta primera edición nun formatu nunca fechu enantes dientro de la música d’Asturies. Tal asina ye, que los responsables del proyeutu escoyeron sacar al mercáu namái una edición llimitada de 250 uds, les cuáles van numeráes, lo que-i da a la obra’l carauter d’única con esta presentación. Nun descarten, si la acoyida ye bona, facer otres ediciones con un formatu más convencional.
La obra, qu’entama dende una idea ecléctica, xune no musical ellementos acústicos del folk nel mesmu planu que la riqueza sonora del rock y pop d’anguaño
Na grabación del discu, llevada a cabo en diferentes enclaves pero, principalmente, nos estudios Tutu de Corvera, participen artistas venceyáos a mui dixebráes estayes dientro de la música d’Asturies. Amás de los nomáos Marcos Álvarez y Gonzalo Pumares, concurren n’esta obra Juan Yagüe, Álvaro Bárcena, Juan Carlos Vega, Sergio Rodríguez, Wilón DeCalle y Juanjo Díaz, quedando les voces en manes de Ana Belén Rodríguez, Esther Yuste, Isa R. Infiesta y Andrea Álvarez, que fói la primera voz de Cerezal. La narración del cuentu fízola una neña de 6 años nomada Ludara.
|
La escena musical asturiana despedía 2024 recibiendo’l primer llanzamientu de Vérsica, un proyectu musical encabezáu polos componentes de Cerezal Gonzalo Pumares y Marcos Álvarez basáu nun cuentu infantil escrito por Pumares. Esta iniciativa orixinal axunta lliteratura; música folk, rock y pop y diseñu artísticu; y el sábadu 8 de marzu va ser la primer oportunidá de vela en directo. La cita va ser les 20h nel CPI de Llugones y con entrada llibre.
Vérsica ye un cuentu que trescurre al traviés de diez cortes musicales y nel que caún d’esos diez cortes ye un poema que, de dalguna mena, esplica una parte de la historia del protagonista del cuentu: un vieyu que yera mozu. Nél recuéyense poemes d’autores consolidaos d’anguaño, de la nomada Segunda Xeneración, o de los años venti del sieglu pasáu. Nomes como Miguel Monteavaro, Xurde Fernández, Vanessa Gutiérrez, Xabiero Cayarga, Taresa Lorences, Nené Losada o Fernán Coronas tán presentes na esbilla de los testos nel que se tuvieron mui en cuenta los sentimientos del protagonista: la soledá, l’abandonu, el mieu o la perda, pero tamién l’amor a la tierra, la conexón cola naturaleza y la felicidá.
Musicalmente Vérsica une elementos del folk acústicu col rock y el pop d’anguaño. La grabación fíxose en dellos espacios pero, sobre manera, nos estudios Tutu de Corvera. Nella participaron artistes venceyaos a estayes mui dixebraes dientro de la música d’Asturies. Amás de los nomáos Marcos Álvarez y Gonzalo Pumares, formen parte d’esta obra Juan Yagüe, Álvaro Bárcena, Juan Carlos Vega, Sergio Rodríguez, Wilón DeCalle y Juanjo Díaz, quedando les voces a cargu d’Ana Belén Rodríguez, Esther Yuste, Isa R. Infiesta y Andrea Álvarez, que foi la primer cantante de Cerezal. La narración del cuentu fíxola una neña de 6 años nomada Ludara.
Formatu físicu
Les artes plástiques son otru de los pegoyos de Vérsica xunto a la música y la lliteratura. Les canciones van ver la lluz en formatu físicu envueltes nuna escultura; un envoltoriu únicu obra del artista Miguel G. Díaz. Va ser la primer vez qu’un proyectu de música asturiana edita la so obra nun formatu asina y, por mor d’esta complexidá, los responsables del proyectu llenden la primer edición a namás 250 unidaes numberaes. Quien quiera facese con una pue acutala a traviés del bandcamp de Versica.
|
