A estes actividaes docentes, lliteraries y periodístiques vieno sumase la so condición d’amena y falanciosa conferenciante, que la llevó per distintes tribunes asturianes pa disertar alrodiu de les sos temes predileutos: la educación, el feminismu y el bable. Entós daquella, María Balbín yá contraxera matrimoniu con Enrique Rodríguez González, un profesor de Belles Artes del que la nueva escritora tomó’l primer apellíu pa añader al so nome de soltera y roblar los sos escritos como María Balbín de Rodríguez. Convien destacar l’importante papel desempeñáu pol profesor Rodríguez González nel desenvolvimientu de la trayeutoria lliteraria de María Balbín dende’l mesmu momentu de la so boda (celebrada en 1911), yá que, lloñe de lo que solía ser habitual ente los homes de la so dómina, non yá nun s’opunxo a que la so brillosa esposa siguiera escribiendo, sinón qu’inclusive la sofitó y animó en toles sos actividaes intelectuales. Tanto foi asina, que la escritora asturiana pudo desendolcar la so carrera docente, lliteraria y periodística a pesar de ser madre de cuatro fiyos.

Dempués de munchos años destinada como maestra en distintes poblaciones de la so rexón, María Balbín foi treslladada a Uviéu (1939) por que siguiera exerciendo los sos llabores educativos nun centru escolar de la capital asturiana. Ellí siguió alternando esta función docente cola so dedicación a la lliteratura, magar nun publicó nengún llibru mientres tola so dilatada carrera lliteraria, con esceición del que diera a la imprenta en 1930, sol títulu de Añoranzas. En 1947, dempués de dedicar casi mediu sieglu a la enseñanza, María Balbín llogró la so xubilación como maestra (1947), lo que-y dexó consagrase a la rellectura y revisión de delles de les sos obres, y a la composición de nuevos poemes.

Foi una muyer d’una amplia cultura, y con aficiones pictóriques y musicales. La rellación más clara que se-y conoz colos intelectuales de la dómina venceyala al matrimoniu formáu por Mercedes Valero y Constantino Cabal. Les collaboraciones de María Balbín nel  diariu Rexón correspuéndense xustamente cola dómina que foi direutor Cabal, y Mercedes Valero responsable de la seición de Sociedá. Sábese que se teníen una y otra amistá y almiración, y puede ser que tamién coincidieren claramente en delles actividaes culturales: les dos escribieron de temática relixosa, y hai noticies de dambes tuvieron dalguna manifestación pública en favor de la igualdá de los derechos de la muyer: María Balbín, como conferenciante na Escuela de Maxisteriu, trató temes rellacionaes col feminismu^[2]. Magar que vivió tiempos políticos  bien distintos y magar la solmenada vida social de l’Asturies del sieglu XX, nun se-y conocen manifestaciones al respective, nin enclín nengunu.

María Balbín vive nun  periodu de grandes cambeos políticos, sociales y económicos: la crisis de la Restauración, la dictadura de Primo de Rivera, la Segunda República, la Guerra Civil y la Dictadura de Francisco Franco, pero nun paez qu’ello quedara reflexáu nos sos escritos calteníos, de los que tamién desconocemos la fecha na que se crearon na mayor parte de los casos.

Nesti sentíu, puede dicise que María Balbín nun ye bien distinta de los escritores contemporáneos que fixeron la obra n’asturianu, a nun ser delles esceiciones. Pero sí podemos dicir que s’estrema de les escritores contemporánees en castellán, tamién asturianes, que sí vivieron la lliteratura d’una manera más comprometida como Eva Canel o Eugenia Ástur, anque tamién ye verdá que les sos circunstancies vitales fueron otres.

La nuesa escritora espresa na so  faer lliterariu les sos vivencies tomaes de la cultura tradicional,  popular, de la relixón, del so oficiu (maestra) y de la materia primo del so oficiu: los neños, a los qu’adoraba.

Pero convien destacar que nun permanecía ayena a tolos problemes sociales que lu arrodiaben: la emigración a tierres americanes ye una tema recurrente na so poesía y na so prosa, pue ser porque-y tocó vivila en carne propio.

Temáticamente, nesti contestu históricu que-y tocó vivir a María Balbín, puede dicise qu’hasta la Guerra Civil significó un periodu muertu na so obra. Nun yeren esos tarreces terribles los qu’ella quería cantar nos sos poemes, sinón lo que supunxera cotidianidá, familiaridá, temes tan cotidianos y familiares que tenía qu’espresalos con un preséu tan propiu como la llingua materna: l’asturianu, anque tamién escribía na llingua que entos entendiase como culta, en castellán.