Préstanos munchísimo anunciar que la Esposición de semeyes El Vistir va tar presente nel 54 Festival Intercélticu de Lorient. Del 2 al 9 d’agostu en Le Palais de la ciudá bretona, dientro del programa EuroCelticArt, van enseñase una selección de retratos qu’Ojos de hojalata, fotógrafu oficial del Concursu Indumentaria, fizo a los participantes del eventu más importante que sobre’l traxe’l país se fai n’Asturies.
La muestra estrenóse na Casa la Cultura de Grau en mayu del 2023. Damos les gracies a la Delegación Asturiana del Festival Intercélticu de Lorient, por ayudanos a dar a valir los nuestros traxes del país y tol trabayu artísticu y artesanu qu’hai en cada pieza que vistimos y calzamos. Y, como siempre, al Ayuntamientu de Grau pol so apueste, fundamental, pola indumentaria asturiana.
