- LNE.es / LNE / El Fielato reel /
De Castiella y Llión al País Vascu, pasando per Castiella-La Mancha, Galicia y Estremadura, les caleyas de Valdesoto dieron la bienvenida a cuatro grupos llegaos de fora d’Asturies. Fueron La Botarga de Cabanillas del Campu (Guadalaxara),el Fulion y Boteiros de Viana do Bolu (Orense), los Visaxes d’Aceuche (Cáceres), l’Entroido de Pombriego (Llión) y l’Antroxu Rural Toribio Herri Iñauteriak de Santa Cruz de Campezo (Álava).
Los Mazcaraos de Rozaes (Villaviciosa), Los Zamarrones de La Pola L.lena y los Sidros y Comedies, xuntu colos Escolinos de Faes (Valdesoto) completaron el cartelu n’una de les ediciones más allegaes que se recuerden.
Los mazcaraos nun defraudaron, porque nel desfile qu’esta mañana repitiose na Pola pudieron vese singularidaes como los espectaculares tocaos de colores de los ourensanes, con personaxes como la mula que siempres va empuesta por un maragatu y que, d’antiguo, xubiase a los sos llombos al cacique del pueblu por que convidase a vinu y viandes a tolos vecinos.
El «fulión» consiste nun grupu de cada unu de los pueblos que faen sonar *rítmicamente grandes bombos y fesories. Ayeri tamién retumbaron en Valdesoto. Como lo fixeron les campanielles de la Botarga de Cabanillas del Campu, que recuperó la so tradición de salir pol pueblu’l día de San Blas colos sos colores llamativos y el so mazcaritu d’espartu tres más de 150 años sumida.
