«Anguaño’l folclor ye moderno, y mola.
Pero eso tamién trai responsabilidaes»
- Fonte: Musicasturiana.com /
Javier Suárez Rodríguez (Xixón, 1979) tien dellos nomes artísticos. Unu d’ellos ye Jazzharr, col que xubió yá trenta y nueve álbumes de música electrónica de llibre accesu a la plataforma Free Music Archive (FMA). Pero’l que-y ta dando notoriedá ye Fruela 757. So esti nome de rei asturianu (al que suma l’añu del entamu del so reináu) ta reinterpretando con llibertá, humor crítico y daqué d’irreverencia la tradición folclórica asturiana.
Toma sones tradicionales y envolubralos con bases electróniques o música negra. Un trabayu revolucionariu que puede escuchase llibremente na plataforma Soundcloud y que llamó l’atención de la cantante Anabel Santiago, que s’alió con Fruela para incorporar al so repertoriu esa visión rompedora del cancioneru tradicional.
Fruela 757 ye ún de los pioneros n’amestar música tradicional con electrónica, reggaeton, rap y otros ritmos etiquetaos como ‘urbanos’. Entamó esti llabor en 2008 y, d’entós pacá, publicó 16 trabayos en Bandcamp, actuó n’eventos mui destacaos y collaboró con artistes como Anabel Santiago o Algaire. Va tiempu que yá nun xube a un escenariu, pero sigue creando música y, tres de llanzar en marzu de 2024 MISA, la selmana pasada tornó con TON4DA, siete temes qu’homenaxeen al son más identitariu del país.
¿Qué ye lo que podemos sentir nesti trabayu nuevu?
Con TON4DA quería facer homenax y siguir la serie de discos que publicara Fono Astur baxo esi nome –Tonada-. Había tres y esti sería’l cuartu. Son siete cantares que tienen un poco de xugar cola imaxinación, del cómo podría sonar un concursu onde Fruela sustituyera al gaiteru. Pero ye, sobremanera, un averamientu más personal o introspectivu, onde intento amosar qué puedo llegar a sentir yo cuando suena asturianada.
«TON4DA ye un averamientu personal y introspectivu onde intento amosar qué puedo llegar a sentir yo cuando suena asturianada»
¿Qué tien d’estremao y en común respecto a anteriores trabayos?
En común, pues que ye Fruela. Pola manera d’averame a la tradición, d’entendela y reinterpretala. Digamos que tien en común el fondu, pero lo que varía ye la forma. La tonada tien pa min la capacidá de date fuercia, d’enllenate’l pechu y calecer la sangre; pero tamién de tolo contrario, de garrate pel pescuezu, sacate les llárimes y facete cimblar les piernes. A veces, too al mesmu tiempu. Ye mui fuerte. Lo que trato facer coles igües y demás ye acompañar y da-y puxu al cantar nuna dirección u otra, según lo que me pida.
N’anteriores trabayos tenía más peso igual un poco más lo primero. El baille, el subidón. Y anque casi siempre había güequín pa lo otro, lo de buscar más garrar la patata, esti ye’l primer trabayu onde predomina esi camín. Los anteriores discos, más na última época, falaben de la rellación de lo tradicional con otres temátiques: el pop llariegu, la migración en Foli, l’éxodu a les ciudaes por trabayu en Fabril… Equí quería facer un cantu a la tonada por sigo mesmo. Siempre busco centrar los temes nel cantar que reinterpreto, pero esta ye la vez que más. Paezme un discu con poco edulcorante, pa «mui cafeteros».
«La tonada tien la capacidá de date fuercia, d’enllenate’l pechu y calecer la sangre; pero tamién de tolo contrario, de garrate pel pescuezu, sacate les llárimes y facete cimblar les piernes»
Pue dicise entós que ye un álbum monográficu dedicáu a la tonada y a dellos de los sos grandes cantadores. ¿Por qué escoyisti estos/es cantadores y estes pieces en concreto? ¿Cuál foi’l criteriu a siguir?
La llista tien que ver col procesu de creación del discu. Primero fici arreglos y frases instrumentales pa llendar el soníu que buscaba. Llueu vieno restolar per casa cantares qu’amestasen bien con eses instrumentales y, en xeneral, col discu. Tamién hebo casos como ‘MARILUZ‘ onde lo primero foi trabayar col cantar, dando-y esi toque vaporwave y llueu, del tirón, grabar penriba’l pianu. Un poco siguiendo lo que comentara del concursu de Tonada. O ‘ROMAN‘, onde’l ruíu de «güevu fritu» del vinilu fizo l’arreglu él solu. Tán esos pero quedaron otros tantos nomes y bases fuera por que nun fui a dar cola tecla pa que funcionara: El Presi, Cuchichi, Busdonga, Josefina Argüelles… Nun sé, igual más alantre alcuentro la fórmula y sal un T5NADA.
«Anguaño nun tengo fecha pa volver a los escenarios. Quería desconectar d’esa parte y centrame no que realmente me presta de too esto, que ye crear, facer música»
Va tiempu que nun se te ve nos escenarios dempués d’unos años de bastante actividá… ¿tienes intención de volver xubir a ellos?
Anguaño nun tengo fecha pa volver. Quería desconectar d’esa parte y centrame no que realmente me presta de too esto, que ye crear, facer música. Pero bueno, tampoco quiero zarrar del too esa puerta nin muncho menos. Ta claro que trabayos como MISA garren sentíu con «ceremonies». Yá se verá.
Pesie al parón en directo, sigues trabayando nel estudiu con constancia. Paez qu’hai Fruela 757 pa ratu.
Alcuérdome cuando salió FABRIL que taba convencidísimu de que yera’l fin. L’EP siguiente col símbolu d’omega venía d’eso. Pero llueu llegó la idea de facer una MISA, y esi tamién paecía l’últimu proyeutu. Nin escenarios nin música nin nada. Y equí toi con trabayu nuevu. Imaxino que siguiré faciendo coses, porque siempre apaecerán nueves idees. La necesidá de crear paez que nun marcha asina que… Pero yá va tiempu que nun siento la urxencia de publicar. Veremos.
«Hai una montonera xente bono, y mozo amás, faciendo coses perinteresantes y que tienen focu. Nun sé si dalguna vegada lo tradi tuvo tan cerca de lo que llamen gran públicu»
Yes de los pioneros n’amestar electrónica y musica de raigañu. ¿Cómo ves la situación actual d’esti estilu?
Pues paez que tamos na cresta la fola. Non namás cola electrónica, sinón colo tradicional en xeneral. Lo que se suel dicir de “tar nel sitiu afayadizu nel momentu xustu” paez que ye agora. Y Bad Bunny sábelo. Hai una montonera xente bono, y mozo amás, faciendo coses perinteresantes, desendolcando estilos y formes como’l local bass na electrónica, por exemplu, y que tienen focu. Porque nun sé si dalguna vegada lo tradi tuvo tan cerca de lo que llamen gran públicu. Falamos muncho d’amestar tradición y modernidá pero paezme qu’esi muru que separaba dambos términos ta cayendo, si nun cayó del too yá.
Anguaño’l folclor ye moderno, y mola. Pero eso tamién trai responsabilidaes. Ye cosa nuestra aprovechar esti tirón pa conectar, pa deprender y compartir, pa reivindicar y esperimentar. Sobre manera pensando en qu’esto nun frene en seco o desapaeza en cuantes llegue otra tendencia o s’abra “otru mercáu”. Que’l mundu ye como ye y ta como ta, y tarde o temprano ye fácil qu’esto llegue.
