Pelegrinos d’EE UU, Italia, Coria y China lleven al Camín Primitivu a otru récord. L’históricu itinerariu yá suma a estes altures un millar de visitantes más que l’añu pasáu y solo en mayu complétase persones procedentes de 76 países. Fonte: LNE
L’interés pela ruta xacobea orixinaria sigue ensin tocar techu. El Camín Primitivu cerró mayu batiendo un nuevu récord históricu de pelegrinos. Dende xineru cubrieron el trazáu basáu na pelegrinación realizada por Alfonso II hasta la tumba del apóstol nel sieglu IX 6.941 persones, un millar más que nel mesmu periodu del pasáu añu, cuando yá se rexistraron númberos nunca antes vistos a esi altor del añu.
Dende l’Asociación Ástur-Lleonesa d’Amigos del Camín de Santiago, colectivu encargáu de xestionar l’albergue «El Salvador», aseguren que la xubida de visites débese, en gran midida, a la creciente llegada d’estranxeros. «Hai enforma italianos, estadounidenses y cada vez más coreanos y chinos», esplica Pablo Sánchez, tesoreru del colectivu.
Les instalaciones, integraes nel complexu del Seminariu Metropolitanu, en Prado Picón, empecipiaron esta selmana con 50 agospiaos de siquier media docena de nacionalidaes. Un síntoma reflexáu nes estadístiques de la Oficina del Pelegrín, l’organismu de Santiago de Compostela que contabiliza’l númberu de persones qu’algama’l xubiléu, según el cual, solo en mayu fixeron el Camín Primitivu persones llegaes dende 76 países distintos.
Gran parte de los que faen nueche suelen empezar la so ruta dende la plaza de la Catedral. Ye’l casu del británicu Jack Miles, quien empecipió la so marcha al pie de un amigu de Madrid na escampada d’Alfonso II. «Quería conocer esta ruta porque me cuntaren maravíes», esplicó l’inglés, qu’a los sos 35 años yá cunta con una amplia esperiencia xacobea. «Ye una manera de faer deporte, turismu y esfrutar de la naturaleza», indica nun intentu por esplicar l’orixe de la so afición al Camín.
Los númberos son especialmente bonos en mayu. La Oficina del Pelegrín contabilizó 3.659 credenciales apurríes de persones que llegaron a Santiago dende la ruta con orixe n’Uviéu y que tien en Llugo otru de los puntos d’ineludible pasu.
Esto traduzse en 120 pelegrinos de media al día, un 15% más nun mes nel que *tradicionalmente inda nun suel haber muncha arribación. «Lo fuerte suel empezar en xunu, pero cada vez vienen antes», sostien Pablo Sánchez, convencíu de que la campaña «Uviéu, orixe del Camín impulsada pol gobiernu d’Alfredo Canteli dende 2019 ta teniendo enforma que ver nesti enclín.
Numberosos pelegrinos almiten, según el personal del albergue, animase a esfrutar d’esti trazáu en conociendo al traviés d’internet o feries especializaes qu’Alfonso II foi’l primer pelegrín de la hestoria. «Muncha xente vien por esa hestoria, anque tamién-yos atrai la Catedral, la cultura y la bona gastronomía», comenten dende los colectivos xacobeos.
